Миср президенти Абдул Фаттоҳ ас-Сисий террорчиликка, биринчи навбатда ИШИДга қарши курашувчи глобал иттифоқ тузишни таклиф қилди. Миср ОАВ маълум қилишича, ас-Сисий бу ҳақда Португалияга сафари олдидан бу давлатнинг Lusa ахборот агентлигига берган интервьюсида айтиб ўтди.
"Мен ИШИДга қарши курашувчи глобал иттифоқ яратишга ҳамда террорчилик ташкилотлари ва гуруҳларига, уларнинг номидан қатъий назар, уруш олиб бораётган давлатларни фаол қўллаб-қувватлашга чақираман. Террорчилик – бу биз дуч келаётган ва нафақат Сурия, Ироқ ва Ливияда мавжуд бўлган, балки бутун дунёга ҳужум қилмоқчи бўлаётган реал душмандир", деб айтган Миср президенти.
Унинг айтишича, халқаро ҳамжамият "ялпи стратегия доирасида ҳаракат қилиши керак". Бу стратегия хавфсизлик масалаларидан ташқари, жамият ҳаётига таъсир қилувчи иқтисодий, ижтимоий ва мафкуравий омилларни ўз ичига олиши керак.
Ас-Сисий ИШИД устидан Мўсул ва Суриядаги ғалаба жангариларнинг бошқа давлатларга қочишига олиб келиши мумкинлигини айтди. "Шу сабабли жангариларга хавфсиз бошпаналар топишига имкон бермаслик учун мен биргаликда ишлашга чақираман", деб таъкидлаб ўтган ас-Сисий.
