Германиянинг Mercedes-Benz компанияси E-Class таснифидаги янги авлод купесининг тизерини намойиш қилди. Унда моделнинг ташқи ва ички дизайнига оид айрим жиҳатларини кўриш мумкин. Автомобиль шу йилнинг 14 декабрида тўлиқ намойиш этилиши кутилаяпти. Унинг илк тақдимоти эса, келаси йилнинг январь ойидаги Детройт автошоусида бўлиб ўтади.
Тизер ортидан Бельгиянинг AutoTijd сайти E-Class купесининг расмий брошюрасидан олинган суратларни эълон қилди. Унда Avantgarde ва AMG Line русумидаги моделларга оид суратлар акс этган.
Икки эшикли автомобиль уч хил бензинли мотор билан таклиф этилади: иккита 2.0 литр ҳажмли 184 ва 245 от кучига эга тўрт цилиндрли ҳамда 3 литрли, 333 от кучига эга олти цилиндрли моторлар жойланади. Бундан ташқари, 194 от кучига эга дизель двигатель ҳам ўрнатилади. Уларнинг барчаси 9 босқичли автоматик узатмалар қутисига эга бўлади. V6 моторли иккита қиммат намуналарида барча ғилдираклари етакчи бўлади.
Унинг энг кучлиси AMG E50 Coupe 4Matic ҳисобланади. Унга 407 от кучига эга 3 литрли V6 двигатель ўрнатилади.
