Туркия хавфсизлик кучлари 1,5 йил давомида Курдистон Ишчилар партиясининг (Partiya Karkerên Kurdistan) 9 500 нафар вакилини йўқ қилган. Бу ҳақда Туркия Фикри Ишиқ маълум қилди.
Унинг сўзларига кўра, аксилтеррор операциялар 2015 йилнинг 24 июлида бошланганди.
Ишиқнинг таъкидлашича, Туркия Қуролли кучлари КИПдан ташқари, бу партиянинг Суриядаги бўлинмалари PYD ва YPG, шунингдек, ИШИД ҳамда DHKP-C гуруҳларига қарши кураш олиб борди. У айниқса кейинги бир неча ойда КИП ўз тарихидаги энг йирик йўқотишларга учраганини айтган.
«Террорчилар заифлашди ва энди шаҳарларни эгаллаб олиш учун ҳарбий ҳаракатлар олиб бора олишмайди. Шунинг учун улар якка ҳолда терактлар содир этиш билан машғул», - деган туркиялик вазир. У КИП яқин орада бутунлай ҳаракатсиз ҳолатга тушиши ва террорчилик фаолиятини давом эттира олмаслигига ишонч билдирган.
Шунинг билан биргаликда Ишиқ Фатҳуллоҳ Гуленнинг FETÖ номли ташкилотига эътиборни қаратган.
«Давлат тузилмаларини Гулен тарафдорларидан тозалаш учун барча чорани кўрамиз», - деган вазир.
АҚШ ва Европа Иттифоқи KИПни террорчилик ташкилотлари рўйхатига киритган.
2015 йилнинг ёзида КИП томонидан Туркия шарқидаги шаҳарлардан бирида йирик теракт содир этилиши ортидан Туркия ҳукумати ва бу партия ўртасида ҳарбий низолар қайта тикланди.
Ўтган вақт ичида Туркия тинч аҳолиси вакилларидан 500 киши ҳамда хавфсизлик хизмати ходимлари бўлган 800 киши тўқнашувлар қурбони бўлган. Туркия хавфсизлик хизмати олиб борган амалиётларга кўра шу вақтгача КИПнинг 8 мингдан ортиқ вакили ўлдирилгани ёки ҳибс қилингани айтилар эди.
