Халқаро туризмда улкан ўзгаришлар юз бермоқда: одамлар кўпроқ саёҳат қилмоқдалар, бироқ сафарлар ва харажатлар ҳажми қисқармоқда, арзончи авиакомпаниялар – лоукостерлар сони кўпаймоқда ва у билан бирга арзон туризм тармоғи кенгаймоқда. Буларнинг барчаси иқтисодиёти катта жиҳатдан туризмга боғлиқ бўлган давлатларга таъсир қилмоқда.
Энг оммавий сайёҳлик йўналишлари ўнталигига кирувчи Греция эса келаётган сайёҳлар сони бўйича бир неча йилдан бери рекорд ўрнатмоқда, бироқ унинг сайёҳликдан олаётган даромади унча тез ошмаяпти. 2016 йилда Грецияга 27,5 млн, яъни 2015 йилдагидан 1,5 млн нафар кўпроқ сайёҳ келган. Мамлакат ҳукумати 3 йилдан кейин сайёҳлар сони 30 млн дан ошишига умид қилмоқда.
Сайёҳларнинг Грецияда бўлиши ўртача вақти 10,7 кундан 7,8 кунгача қисқарди. Бу ҳолат сайёҳлар ўртасида дам олиш кунлари турлари – 2-4 кунга мўлжалланган City Break ва арзончи авиакомпаниялар кўпайгани билан боғланган. Бундай авиакомпаниялар хизматидан таътилга камроқ пул сарфлашга тайёр бўлган сайёҳлар фойдаланадилар.
Грецияда сайёҳликнинг ривожланишига бу ерда евронинг долларга нисбатан айирбошлаш курсининг пасайгани ҳам ижобий таъсир қилган. Бундан ташқари, Греция Ўрта ер денгизининг шарқий қисмидаги дам олиш учун энг хавфсиз жойлардан бири ҳисобланади.
