Рим папаси Франциск шанба куни эрталаб Фаластин етакчиси Маҳмуд Аббосни қабул қилди.
Corriere della Sera газетасининг хабар беришича, понтифик ва Фаластин миллий маъмурияти раисининг суҳбати 23 дақиқа давом этган. Томонлар учрашув аввалида бир-бирларига совға улашишган.
Рим папаси Франциск ва Аббос Фаластиннинг Ватикандаги элчихонаси очилишини муҳокама қилишди. Унинг расмий очилиш маросимида Маҳмуд Аббос ҳам иштирок этади.
"Бу папа фаластинликлар ва тинчликни яхши кўришидан далолат", - деган Аббос учрашувдан сўнг.
Фаластин миллий маъмуриятининг Ватикандаги элчихонаси 2015 йилнинг июнида икки мамлакат ўртасидаги ўзаро муносабатлар тўғрисида имзоланган келишув сабаб очилмоқда.
Ватикан ва Фаластин озодлик ташкилоти томонидан расмий муносабатлар 1994 йилнинг 26 декабрь куни ўрнатилган. Шундан сўнг ўзаро келишув матни устида иш бошлаган икки томонлама комиссия тузилди. “Асос келишуви” номи остидаги битим 2000 йилнинг 15 февраль куни имзоланган. Шу билан бир қаторда, томонлар келажакда ўзаро алоқалар тўғрисидаги икки томонлама келишув имзоланиши учун ҳамкорликда ишлашга келишиб олишди. Бироқ бу Рим папаси Бенедикт XVI’нинг муқаддас ерларга 2010 йилда уюштирган зиёратидан сўнг рўй берган.
