Хитой ижтимоий тармоқларида янги Nokia 6 смартфонининг мустаҳкамлиги билан боғлиқ роликлар тақдим этилмоқда. Ускуна ёрдамида ҳаттоки грек ёнғоқларини ҳам чақиб кўришган.
Иккинчи роликда смартфонни бир неча бора ерга ташлаб, сўнг деворга қараб улоқтиришлари тасвирланган.
Янги ускуна 19 январдан бошлаб сотувга чиқарилади. У Хитой бозорига мўлжалланган бўлиб, JD.com сайтида 245 долларга баҳоланиши кутилмоқда. Сотувлар бошланишига икки кун қолганда Nokia 6’га берилган буюртмалар сони миллионта нусхага етди.
Смартфон экрани 5,5 дюймли диагоналга эга бўлиб, 1920 га 1080 пиксель кенгликдан иборат. У Corning Gorilla Glass 3 ҳимоя ойнаси билан қопланган. Бундан ташқари, Nokia 6 саккиз ядролик Qualcomm Snapdragon 430 процессори, Adreno 505 графикаси, 4 ГБ оператив ва 64 ГБ ички хотирага эга.
Маълумот учун, Nokia телефонлари орасида Nokia 3310 энг кўп сотилган ускуна деб ҳисобланади. Тармоқда ўта мустаҳкам бўлган бу телефонга турли йўллар билан зарар келтирмоқчи бўлган фойдаланувчиларнинг роликлари кўплаб топилади. Баъзилар бунинг уддасидан ҳам чиққан.
