АҚШнинг 41-президенти Катта Жорж Буш Хьюстондаги шифохонанинг жонлантириш бўлимига ўтказилди. Ҳозирда унинг аҳволи барқарор дея баҳоланмоқда.
Бу ҳақда Reuters ахборот агентлиги собиқ президентнинг матбуот хизматига иқтибос келтирган ҳолда хабар бермоқда.
Катта Буш ўткир нафас олиш муаммоларидан азият чекмоқда, шифокорлар унинг нафас йўлларини тозалаш муолажаларини ўтказишган. Айни вақтда собиқ президент жонлантириш бўлимида шифокорлар назорати остида қолмоқда.
Президентнинг рафиқаси Барбара Буш ҳам толиққанлик ва йўтал сабабли эҳтиёт чораси сифатида шифохонага ётқазилган.
NBC телекомпаниясининг маълум қилишича, Катта Бушнинг шифохонага ётқазилишига нафас сиқиши сабаб бўлган. Июнда 92 ёшни қаршилаган Катта Буш ҳозирда ҳаёт бўлган АҚШнинг энг кекса собиқ президенти ҳисобланади. У уйига бир неча кундан кейин қайтиши мумкин.
АҚШнинг 41-президенти Паркинсон касаллигидан азият чекади ва махсус аравачада ҳаракатланади. 2015 йилда у уйида йиқилиб тушиб, бўйин қисмидаги умуртқа суякларидан бирини синдириб олган.
