Германия канцлери Ангела Меркель Туркияга 1 кунлик ташрифи давомида мамлакат президенти Ражаб Тоййиб Эрдўған билан учрашди. Сиёсатчилар Сурия ва Ироқдаги вазиятни муҳокама этишди.
Эрдўған «ислом терроризми» атамасини истеъмолдан чиқариш кераклигини таъкидлаган.
Қўшма матбуот анжумани вақтида Туркия раҳбари «ислом терроризми» атамасидан фойдаланишга йўл қўйиб бўлмаслиги ҳақида гапирган.
«Бундай ифода қўллаш тўғри эмас. Ислом динини терроризм билан боғлаш керак эмас. Ислом - тинчлик дегани, бу диннинг терроризм билан умумий ҳеч бир жиҳати йўқ. Бу иборани қўллаш мусулмонларнинг диний туйғуларини таҳқирлашдир», - деган Эрдўған.
Туркия президенти ИШИД туфайли ҳам «ислом терроризми» атамасини қўллаб бўлмаслигини таъкидлаган.
«Акс ҳолда Туркия ва бошқа мусулмон давлатлари бундай баёнотларга қарши чиқади. Мусулмон давлатлари ислом дини терроризм билан бирга тилга олинганида жим қараб тура олмайди», - дея қайд этган Эрдўған.
«Мен мусулмон президент сифатида буни қабул қила олмайман. Дунёнинг ҳеч бир давлати ИШИДга қарши курашда Туркия каби ҳаракат қилгани йўқ. Анқара террористларга қарши курашиб келмоқда ва курашишда давом этади», - деган туркияликлар раҳбари.
Эрдўған PKK, PYD, YPG ва Фатҳуллоҳ Гулен ташкилотини ҳам террористик ташкилотлар сифатида келтирган.
«Агар Туркияда давлат тўнтариши амалга оширмоқчи бўлган исёнчилар Европага қочиб, Германиядан қўним топган бўлса, расмий Берлин бу борада зарур чораларни кўрмоғи лозим», - дея давом этган президент.
Президентнинг сўзларига кўра, Туркия – дўстлик истовчи ва НАТО бўйича Германиянинг иттифоқчиси бўлган мамлакат. Шу билан биргаликда тегишли масалалар тезкорлик билан ҳал қилинмоғи лозим.
«Туркия терактлар туфайли катта зарарлар кўрди. Биз терроризмга қарши, жумладан Курдистон ишчилар партиясига қарши курашда Туркия билан ҳамкорлик қиламиз. Бу террорчи ташкилот таъсири Сурия ва Ироққа ҳам ёйилган», — дея қайд этган Меркель хоним.
