Теннис бўйича норасмий жаҳон чемпионати ҳисобланган Дэвис кубогининг Осиё ва Океания минтақасида Ўзбекистон терма жамоаси ва Жанубий Корея тўқнашуви бошланди. Бугун, 3 февраль куни ушбу қарама-қаршилик доирасида 2 учрашув бўлиб ўтди.
Биринчи бўлиб кортга Ўзбекистоннинг иккинчи рақамли ракеткаси Санжар Файзиев чиқди. У жаҳон теннис рейтингида 367-ўриндан жой олган, унинг рақиби Хён Чон эса 73-ўринда эди. Бу баҳсда кореяликлар вакилининг қўли баланд келди. 5 сет давом этган баҳс натижаси қуйидагича бўлди — 4:6, 4:6, 7:6, 6:4, 0:6.
Australian open—2017 турнирида муваффақиятли иштирок этиб, жаҳоннинг иккинчи ракеткаси Новак Жоковични сенсацион тарзда турнирдан чиқариб юборган, якунда ATP рейтингида 37 поғона юқорилаб, 80-ўриндан жой олган, Ўзбекистоннинг биринчи рақамли теннисчиси Денис Истомин эса ўз рақибини енгиб, Ўзбекистон термасига 1 очко тақдим этди. Унга Ли Док Ҳи рақиблик қилганди. Баҳс натижаси қуйидагича кўриниш олди: — 4:6, 6:2, 7:6, 6:4.
Дэвис кубоги
Осиё ва Океания минтақаси
3 февраль, жума
Жанубий Корея — Ўзбекистон 1:1
Хён Чон — Санжар Файзиев 6:4, 6:4, 6:7, 4:6, 6:0
Ли Док Ҳи — Денис Истомин 6:4, 2:6, 6:7, 4:6
4 февраль куни жуфтлик беллашувлари бўлиб ўтади. 5 февраль куни ўтказиладиган яккалик баҳслари билан Жанубий Корея — Ўзбекистон ўйинида ғолиб номи аниқланади.
