АҚШ денгиз пиёда қўшинлари капитани Жошуа Уодделл Marine Corps Gazette нашридаги мақоласида АҚШ ҳарбий сиёсатини танқид қилди ва Россия армиясини ўрнак қилиб кўрсатди. Унинг фикрича, Россия қуролли кучлари анчагина "камтарроқ" бюджетга эга бўлса-да, АҚШ армиясидан самаралироқдир.
Унинг айтишича, Пентагон мудофаа технологияларига сон-саноқсиз пуллар сарфлайди, бироқ бошқа муҳим жиҳатларга эътибор қаратмайди.
"Биз зобитлар Ироқ ва Афғонистондаги урушни ютқазганимизни қабул қиладиган вақт келди. Биз тактик ғалабани тезкор ва стратегик муваффақиятга айлантира олмадик", деб ёзмоқда Уодделл.
Уодделлнинг таъкидлашича, АҚШнинг қимматбаҳо танки M1A1’ни бор-йўғи 20 долларлик снаряд билан яроқсиз ҳолга келтириш, мисли кўрилмаган маблағларга қурилган авиаташувчи кемани эса бирваракайига отилган бир нечта ракета билан чўктириб юбориш мумкин.
Ҳарбийнинг фикрича, Россия бутун армиясига АҚШ ўз ҳарбий-денгиз кучларининг ўзига сарфлайдиган маблағдан кўра 2 баробар камроқ пул ажратади, бироқ Вашингтонни Сурияда "ноқулай вазиятга" қўя олди.
