Мексика президенти Энрике Пенья Ньето Вашингтон маъмурияти билан нормал муносабатлар ўрнатиш истагини билдирди, деб хабар қилмоқда РИА «Новости» агентлиги.
У бу ҳақда АҚШ давлат котиби Рекс Тиллерсон ва миллий хавфсизлик вазири Жон Келли билан учрашуви якунларига кўра баёнот берган.
«Дональд Трамп маъмурияти бошқарувининг бошланғич босқичида икки вазирнинг Мексикада бўлиши ижобий муносабатлар ўрнатиш манфаатдорлигидан дарак беради. Бу ўз навбатида Мексика ва Қўшма Штатлар хавфсизлиги, тараққиёти ва фаровонлиги учун энг яхши шароитларни барпо қилади», — деган Мексика етакчиси.
Энрике Пенья Ньетонинг таъкидлашича, мамлакат ҳукумати учун АҚШдаги мексикаликларнинг ҳуқуқларини ҳимоя қилиш муҳим вазифалардан биридир.
Бундан аввалроқ, АҚШ миллий хавфсизлик вазири Жон Келли АҚШдан Мексикага депортацияларни амалга оширишда ҳарбийлар хизматидан фойдаланилмаслигига ойдинлик киритган эди.
