Ўрта истиқболда Ўзбекистон Республикасида туризмни ривожлантириш бўйича Концепцияда кўзланган лойиҳалар ва ишлар амалга оширилиши билан қуйидаги натижаларга эришилади:
Хусусан, Ўзбекистонда самарали, рақобатбардош туризм комплекси ташкил этилади. У минтақалар ривожланиши ва минтақалараро алоқаларнинг асосий пойдеворларидан бири бўлади ҳамда ўз атрофидаги кичик ва ўрта бизнес ривожига туртки беради. Унга кўра, 2017-2021 йиллар оралиғида туризм саноатининг асосий капиталига киритиладиган сармоя миқдори 298,2 млрд сўмни ташкил этади.
Ўзбекистон Республикасининг турли тоифадаги фуқароларининг фаол ва тўлиқ дам олиш борасидаги талабларини қондириш, саломатлигини мустаҳкамлаш, маданий қадриятларга ошно қилишга эришилади. Шу билан бирга, Ўзбекистонга келувчи хорижий сайёҳлар сони 2017 йилги 2 млндан ортиқ кишидан 2021 йилга бориб 2,5 миллион кишидан ортиқроқни ташкил этади.
Туризм соҳасида қўшимча иш ўринлари яратиш воситасида аҳоли бандлик даражасини оширишга эришилади. Бу мақсадлар меҳмонхоналар, сайёҳлик фирмалари ва ташкилотлар сонини кўпайтириш орқали амалга оширилади. Жумладан, 2021 йилга бориб Ўзбекистонда 2017 йилги 680 та меҳмонхоналар сони 1036тага етказилади. Сайёҳлик операторлари сони 441тадан 565тагача ортади.
Туризм соҳасида хизмат кўрсатиш ҳажмини ошириш билан маҳаллий ва давлат бюджетлари даромади ортади. Аҳолига ҳақ тўланувчи туристик хизматлар кўрсатиш сони кенгаяди, меҳмонхоналарда қолиш ҳолатлари кўпаяди. Бунинг натижасида 2021 йилда сайёҳлик соҳасида 2 млрд 722 млн долларга яқин хизматлар экспорт қилинади.
Норматив-ҳуқуқий ҳужжатлар муҳокамаси сайтига жойлаштирилган «Ўзбекистон Республикасида ўрта истиқболда туризмни ривожлантириш бўйича Концепциясини ҳаётга татбиқ этиш чоралари тўғрисида»ги қарори лойиҳасида шу ҳақда сўз юритилган.
