Германиянинг Фленсбург шаҳри атрофида ўтловчи сигирлар подасига ёввойи буғу келиб қўшилди. Бу ҳақида Local нашри хабар берди.
Маҳаллий аҳоли буғуни икки йилча аввал сезишган. У мунтазам равишда сигир подасига келиб қўшилиб, улар билан бирга вақт ўтказган. Баъзан жонивор ўрмон томон кетиб, бир неча ҳафта ёки ой йўқ бўлиб кетган, бироқ доим ортига қайтган. Шохларига қараганда, у камида 5 ёшда.
"Эҳтимол, у сигирлар орасида ўзини анча хавфсиз ҳис қилар, чунки бу ерда уни ҳеч ким овламайди", - дейди Германиянинг Табиатни муҳофаза қилиш ассоциацияси ходимаси Катрин Кох. Бундан ташқари, унинг сўзларига кўра, жониворни қорамоллар озуқаси ҳисобланган хашак жалб қилган бўлиши мумкин.
"Ҳозир у ўзини сигир ҳисобласа керак", - дея ҳазиллашади ташкилот бошқарувчиси Герд Кеммер. Буғу одамларга анча ўрганган.
