4 март куни Туркия чегарасида қулаган Сурия ҳарбий самолёти учувчиси 5 март куни тонгида катапульта қилган парашютидан 500 метр нарида бемажол ҳолда топилди.
Туркия бош вазири ўринбосари Нуриддин Жаникли Хатай вилояти жанубида топилган ушбу учувчи айни вақтда шифокорлар назорати остида эканини маълум қилди.
«Биз ҳодисанинг барча жиҳатлари ўрганилганидан кейин қарор қабул қиламиз. Ҳозирча бу ҳақда гапиришга эрта. Туркия чегарасида нима рўй берганини аниқламоқ даркор. Унинг миссияси нима бўлган. Ўйлайманки, яқин вақтлар ичида бир қарор чиқарилади», - деган Жаникли.
Самолётнинг қулашига унинг пулемётдан ўққа тутилиши сабаб бўлган бўлиши мумкин.
Бундан олдинроқ «Аҳрор аш-Шом» террорчилик ташкилоти жангарилари Суриянинг Идлиб вилоятида МиГ-21 ҳарбий самолётини уриб туширгани ҳақида ахборот берганди.
Бошқа бир нашрда эса МиГ-21 техник носозлик сабаб Туркия ҳудудига қулагани эҳтимоли ҳақида хабар қилди.
