Исроил бош вазири Биньямин Нетаньяху мамлакатда Фаластин собиқ етакчиси Ёсир Арофат шарафига аталган кўча пайдо бўлишига йўл қўймаслигини маълум қилди. Бу ҳақда унинг фейсбук’даги саҳифасида хабар берилган.
«Исроил давлатида ҳеч бир кўча исроилликлар ва яҳудийлар қотилларининг номи билан аталмайди», - деган у ҳукумат йиғилишида.
Нетаньяхунинг қўшимча қилишича, кўчалар Ёсир Арофат, Ҳожа Амин ал-Ҳусайни ва бошқаларнинг номи билан аталишига йўл қўймаслик даркор.
Бош вазирнинг таъкидлашича, у бунга йўл қўймаслик учун қонунчилик чораларини қабул қилишга ҳам тайёр.
Аввалроқ Исроил шимолидаги Жатта аҳоли пунктида (11 минг киши истиқомат қилади) «Арофат кўчаси» дея кўрсатилган белгини топишганди.
