«Арсенал» ҳужумчиси Алексис Санчес Англия чемпионатининг 27-турида «Ливерпуль»га қарши кечган ва 1:3 ҳисобидаги мағлубият билан учрашувнинг бошланғич таркибидан ўрин олмаганди. The Telegraph хабарига кўра, чилилик футболчи ўйиндан бир неча кун олдин ўз жамоадошлари билан жанжаллашиб қолганди.
28 ёшли ушбу футболчи жамоанинг машғулоти пайтида майдонни тарк этган. Шундан сўнг бошқа футболчилар ва Алексис ўртасида можаро келиб чиққан.
Шу туфайли жамоа бош мураббийи Арсен Венгер «Ливерпуль»га қарши ўйинда Санчесни захирада қолдиришга қарор қилган. У танаффусдан кейин майдонга туширилди ва ўйинни бутунлай ўзгартириб юборди. Арсен Венгер эса ўйиндан кейин буни тактик юриш сифатида баҳолаганди.
Санчеснинг «Арсенал» билан амалдаги шартномаси 2018 йилнинг ёзига қадар тузилган. Жамоа етакчи футболчисига янги шартнома таклиф қилиб, унинг ҳафталик маошини ҳозиргига нисбатан (130 минг евро) 50 минг еврога оширишни режалаштирмоқда. Аммо Алексиснинг ўзи 250 минг евродан кам ҳафталик маошга рози бўлмаяпти.
Айни вақтда ушбу футболчига «Манчестер Сити», «Ювентус», «ПСЖ» ва «Интер» каби жамоалар қизиқиш билдиришмоқда. «Арсенал» эса у кетган тақдирда, унинг ўрнини Ляказетт, Ройс ва Андре Сильва каби футболчилардан бири билан тўлдирмоқчи.
