Туркиянинг оила ишлари бўйича вазири Фатма Бетул Саён Кайя Нидерландия ҳукумати Туркия ташқи ишлар вазири Мавлуд Човушўғлу самолётига қўнишга рухсат бермагандан кейин, бу мамлакатга қуруқликдаги транспорт билан етиб олмоқчи. Бу ҳақда "Анадолу" ахборот агентлиги хабар бермоқда.
Ахборот агентлиги маълумотларига кўра, ҳозирда Кайя Германияда сафарда. Энди вазир Нидерландияда унинг иштирокидаги тадбирлар бекор қилинганига қарамасдан, у ерга йўл олмоқчи.
Мавлуд Човушўғлу 11 март куни Нидерландиянинг Роттердам шаҳрида турк жамоаси намойишида иштирок этиб, икки фуқароликка эга туркларни Туркия конституциясига ўзгаришларни қўллаб-қувватлашга чақирмоқчи эди. Туркияда бошқарувнинг парламент шаклидан президентлик шаклига ўтишни кўзда тутувчи конституцияга ўзгаришлар бўйича референдум 16 апрелда бўлиб ўтади.
Роттердам мэри Нидерландия ҳукумати Човушўғлуга намойишда иштирок этишга рухсат бермаслигини айтганига қарамасдан, турк вазири барибир Роттердамга боришини ва агар нидерландлар унга қаршилик кўрсатсалар, санкциялар қўллаш билан таҳдид қилганди. Шундан кейин Нидерландия ҳукумати Човушўғлу самолётига мамлакатга қўнишга рухсат бермаган.
