Украина пойтахти Киев шаҳрида Россия Давлат думаси собиқ депутати Денис Вороненков ўлдирилди. Бу ҳақда «112 Украина» телеканали хабар берди.
Киев полицияси раҳбари Андрей Кришенко ўлдирилган шахс Россия Давлат думасининг собиқ депутати Денис Вороненков эканини тасдиқлади.
Гувоҳларнинг маълумотига кўра, камида етти бора ўқ товушини эшитишган.
Украина президенти Пётр Порошенко Украина хавфсизлик хизмати раҳбари Василий Грицакни ушбу ҳолат юз берганидан сўнг тезлик билан чақиртирган, деб хабар тарқатди УНИАН.
Маълумотларга кўра, отишма Киев марказидаги «Премьер-палас» меҳмонхонаси ёнида юз берган.
Андрей Кришенконинг маълум қилишича, Денис Вороненковнинг ўлдирилиши буюртма қилинган бўлиши мумкин. Бу ҳақда РИА «Новости» хабар берди.
«Албатта, буюртма қотиллик. Бу ҳозирда кўриб чиқилаётган биринчи версия ҳамда у марҳумнинг фаолияти билан боғлиқ», - деди Кришенко.
Украина ИИВ раҳбари маслаҳатчиси Антон Герашенко Вороненковнинг ўлдирилишини сиёсий деб атади. У бу ҳақда Фейсбукдаги саҳифасида ёзган.
«Бу буюртма сиёсий қотиллик ҳамда Россиядан Ғарбга ёки Украинага қочиб кетишни истаган россиялик депутат ва амалдорларни қўрқитиб қўйиш мақсадида амалга оширилган... Марҳумнинг рафиқаси, яқинлари ва дўстларига ўз таъзиямни билдираман», - дея маълум қилган Герашенко.
Бироз ўтиб Киев шаҳри полиция бошқармаси бошлиғи Андрей Кришенко Вороненковнинг эҳтимолий қотили жароҳат олгани ҳамда қўлга олингани ҳақида маълум қилди.
«Қотилга биринчи тиббий ёрдам кўрсатилди, у қўриқлаш хизмати назорати остида», - деди Кришенко.
Украина бош прокурори Юрий Луценко Денис Вороненковнинг ўлдирилишини, у Украина собиқ президенти Виктор Януковичнинг иши бўйича гувоҳ сифатида ўтгани билан боғлаган.
“Халқ фронти”дан украиналик депутат Антон Герашенко эса Вороненковнинг ўлдирилишини журналист Павел Шеремет ва россиялик мухолифатчи Борис Немцовнинг ҳалокатига ўхшатган.
Россия президенти Владимир Путинга Вороненков билан боғлиқ фожиали ҳодиса бўйича барча маълумотларни етказишган.
