Афғонистон ҳукумати мамлакат махсус бўлинмалари сонини икки баравар оширмоқчи. Ҳозирда, уларнинг сони 17 минг ҳарбий хизматчини ташкил этади, деб хабар қилмоқда Рейтер агентлиги маҳаллий ва ғарб мулозимларига асосланган ҳолда.
Хабарларга кўра, Афғонистоннинг 300 минг кишилик армиясининг унча катта бўлмаган қисмини ташкил этувчи махсус кучлар мамлакатда олиб бориладиган ҳужумкор амалиётларнинг 70 фоизини бажаради.
"Бизнинг махсус бўлинмаларимиз кучайтирилиши ва яхшироқ жиҳозланиши керак", — деган мудофаа вазирлиги вакили Давлат Вазирий. У аниқ рақамларни келтирмаган, бироқ махсус бўлинма армия корпуси даражасига етказилишини қўшимча қилган.
Агентлик манбаларининг сўзларига кўра, гап уларнинг сонини икки карра ошириш ҳақида бормоқда. Афғон ҳукумати, айни вақтда, хорижий донор мамлакатлар билан ушбу режани лойиҳалаштириш борасида музокаралар олиб бормоқда.
