Испания конституциявий суди Каталония парламентининг кейинги йилги ўз бюджетига вилоятнинг мустақиллиги бўйича референдум ўтказилиши моддасини киритиши юзасидан Испания ҳукуматининг даъвосини кўриб чиқишга қабул қилди. Бу ҳақда El Pais нашри хабар бермоқда.
Шу тариқа Каталония мухториятининг референдум ўтказиш ташаббуси амал қилиши автоматик тарзда тўхтатилади.
Испания конституциясининг 161.2-моддаси ҳукуматга мухтор вилоятлар органлари томонидан қабул қилинган қарорлар бўйича судга шикоят қилишга имкон беради. Қонунчиликка кўра, модда қўлланганда "шикоятга учраган қарор ва фармонлар амал қилиши тўхтатилади, бироқ конституциявий суд бундай тўхтатишни ёки тасдиқлаши, ёки шикоятни 5 ойдан ошмайдиган муддат ичида рад этиши керак".
Каталония парламенти 22 мартда референдумни ташкиллаштиришга маблағлар ажратилиши имкониятини маъқуллаганди.
Каталония Испания шимолидаги мухтор ҳамжамият бўлиб, охирги йиллар ҳудудда айирмачилик кайфиятлари сезиларли кучайган. 2016 йил 6 октябрда вилоят парламенти вилоятнинг Испания таркибидан 2017 йил сентябригача чиқиш бўйича референдум ўтказилиши резолюциясини қўллаб-қувватлаганди. Бунинг ортидан Испания конституциявий суди ушбу ҳужжат амал қилишини бекор қилганди.
Испания конституциясида мухтор вилоятга марказий ҳукумат билан келишилмаган ҳолда референдум ўтказишга ва бир томонлама тартибда мустақилликни эълон қилишга имкон берувчи моддалар мавжуд эмас.
