Tesla Motors компанияси бозордаги қиймати бўйича Ford компаниясини ортда қолдирди. The Wall Street Journal нашрининг маълум қилишича, "Тесла" акциялари у рекорд даражадаги сотувларга эришгани ҳақидаги маълумот чоп этилгандан кейин 7 фоиздан кўпроққа ўсди. Бу эса компаниянинг бозордаги қийматининг 48,7 млрд доллардан ошишига олиб келди. "Форд"нинг қиймати эса 45,6 млрд долларни ташкил қилмоқда.
"Тесла" охирги ярим йилдан бери арзонлашаётган "Форд"дан илк бор ўтиб кетди. Шу тариқа электрокар ишлаб чиқарувчи компания қимматлиги бўйича АҚШ автоконцернлари ўртасида 2-ўринга кўтарилиб олди. Бу борада 1-ўринни General Motors эгаллайди, унинг бозор қиймати 51,2 млрд долларни ташкил қилади.
Аввалроқ "Тесла" 2017 йилнинг 1-чоракида рекорд даражадаги 25 мингта автомобиль сотгани маълум бўлганди. Бу эса ўтган йилнинг шу даврига нисбатан 69 фоиз кўпроқни ташкил қилган. Шу билан бирга 1-чоракда сотилган автомобиллар миқдорига чорак охирида мижозларга етказиб берилиш жараёнида бўлган 4650 та машина киритилмаган.
Таққослаш учун, "Тесла" 2016 йилда 76 мингтага яқин, Ford эса 6,7 млн та машина сотган.
