Украина президенти Пётр Порошенко "Russia" ёзувли футболкани кийган ҳолда дўстлари билан суратга тушган 15 ёшли ўғли Михаил билан тарбиявий суҳбат олиб боргани ва ўғли нима учун бундай қилганини маълум қилди.
Эслатиб ўтамиз, 5 май куни украиналик журналист Левко Стек Facebook’даги саҳифасида Михаил Порошенконинг "Russia" ёзувли футболкани кийиб олган ҳолда тушган суратини чоп этганди.
Порошенконинг айтишича, бу футболка кенжатойига тегишли бўлмаган. У футболкани фақатгина Хеллоуин байрами учунгина кийган.
"Бу Instagram’даги сурат бўлган, у Хеллоуин байрами билан боғлиқ. Кимдир қўрқинчли қиёфада бўлган, кимдир футболка кийиб олган", деб айтди Порошенко матбуот-анжуманда.
АҚШда кенг нишонланувчи бу байрамда турли қўрқинчли кўринишларга кириш одат ҳисобланади. Бироқ Порошенко Хэллоуинга ҳам бундай кўринишда бўлиш ярамаслигини таъкидлаб ўтди.
"Мен ҳаттоки Хэллоуинда ҳам бундай кўринишда бўлишни номақбул деб ҳисоблайман. Бу ҳолат юзасидан 15 ёшли ўғлим билан жиддий суҳбат ўтказдим. Сизларни ишонтириб айта оламанки, мен ўғлим қилган ишини англаши учун унга нисбатан керакли сўзларни топа олдим", деб айтган Порошенко.
Порошенконинг айтишича, унинг ўғли фақатгина бир марта шундай кўринишда бўлган.
