АҚШ молия вазирлиги Эрон томонидан Американинг Boeing авиакомпанияси ва Европанинг Airbus концерни самолётларини харид қилиш учун жойлаштирилган буюртмаларини ўрганмоқда. Бу ҳақда молия вазири Стивен Мнучин чоршанба куни АҚШ Конгресси вакиллар палатасида айтиб ўтди.
"Boeing ва Airbus билан боғлиқ ҳолатда лицензиялар талаб этилади, ҳамда келишувлар кўриб чиқиш жараёнида", - дея таъкидлаб ўтди идора раҳбари. Вашингтон маъмурияти айни дамда Теҳронга нисбатан ўз сиёсатини қайта кўриб чиқмоқда.
Молия вазирлиги Эронга фуқаролик ҳаво кемаларини экспорт қилиш бўйича келишувларни амалга ошириш учун рухсат бериши талаб этилади. Бундай лицензиялар Қўшма Штатлар ва бошқа давлатларда Америка иштирокида ишлаб чиқарилган учар қурилмаларни қамраб олади.
Ўтган йилнинг июнида Эрон Boeing’га 100 та самолёт учун буюртма бергани, уларнинг умумий қиймати 25 млрд. доллар экани маълум бўлганди. Шунингдек, Теҳрон Airbus’дан 22 млрд. долларлик қийматга эга бўлган 118 та тижорат йўловчи самолётларини буюртма қилган.
АҚШ молия вазирлиги эса сентябрда Эронга Boeing самолётларининг биринчи партиялари экспорти учун лицензия бера бошлади. Бироқ АҚШнинг амалдаги маъмурияти бу жараённи тўхтатиб қўйишга қарор қилди.
