Буюк Британия шаҳзодаси Уильям 17 ёшли чўкаётган ўсмирни қутқариш операциясида иштирок этди, бироқ операция муваффақиятсиз якунланган ва ўсмир чўкиб кетган. Ўсмирнинг жасади бир соатдан кейин топилган, деб ёзмоқда The Telegraph нашри.
Воқеа 26 май куни Лондон яқинидаги Ли Вэлли боғидаги кўлда юз берган. Ўсмир кўл ўртасидаги оролчага сузиб етиб олмоқчи бўлганда чўкиб кетган.
Фавқулодда хизматларга кўлда ўсмир чўкаётгани ҳақида хабар келиб тушгандан кейин шаҳзода Уильям тез ёрдам вертолётини бошқариб воқеа жойига йўл олган. Ушбу ҳолат тасвирланган видеода шаҳзода вертолётни қўндиргач, воқеа жойига шошилганча йўл олганини кўриш мумкин.
Гувоҳларнинг айтишича, воқеа жойига иккита вертолёт келган, улардан бири полицияга тегишли бўлган.
Таъкидланишича, майдони 40 квадрат км ни ташкил қиладиган Ли Вэлли боғида чўмилиш тақиқланган бўлган.
Буюк Британия валиаҳд шаҳзодаси Уильям 2008 йилда учувчи сертификатини олган. У сўнгра қироллик ҳарбий-ҳаво кучларининг қидирув-қутқарув кучларида хизмат қилиш учун вертолётда парвоз тайёргарлигидан ўтган. Уильям 2011 йилда россиялик денгизчиларни чўкаётган Swanland кемасидан қутқариш операциясида иштирок этган. У Британия армиясидан 2013 йилда кетиб, фуқаролик учувчисига қайта ўқиб, 2015 йилда Шарқий Англия санитар авиациясида ишлай бошлаган.
