«Реал» клуби бош мураббийи Зинедин Зидан Европа чемпионлар лигасининг «Ювентус»га қарши финали олдидан футболчиларга мотивация бериш учун кино қўйиб беришга қарор қилди. Бу ҳақда Marca нашри хабар тарқатди.
Манба берган маълумотга кўра, француз мутахассиси бунинг учун 2006 йилда режиссёр Зак Снайдер томонидан суратга олинган «300 спарталик» фильмини танлади. Футболчилар кинонинг энг ёрқин лаҳзаларини кўриш имкониятига эга бўлишди. Мураббий бу орқали футболчилар спарталиклар сардори Леонид ва унинг жангчилари каби руҳга эга бўлишини истаган. Унинг фикрича, фильмни томоша қилиш футболчиларга қўшимча мотивация беради.
Мазкур фильм ёзувчи Фрэнк Миллернинг асарига асосланган бўлиб, воқеа Форс шоҳи Кайхусравнинг минглаб аскарларини тўхтатишга муваффақ бўлган 300 спарталик баҳодир ҳақида боради.
Эслатиб ўтамиз, Европа чемпионлар лигасининг «Реал» ва «Ювентус» ўртасидаги финал учрашуви 3 июнь куни Уэльс пойтахти Кардиффдаги «Миллениум» стадионида бўлиб ўтади. Учрашув Тошкент вақти билан соат 23:45да бошланади.
