“Ўзбекистон ҳаво йўллари” МАК Тожикистон пойтахтига парвозларни қисқартирди. Эндиликда, Тошкент-Душанбе-Тошкент йўналиши бўйича парвозлар ҳафтада бир марта – сешанба кунлари амалга оширилади. Авиачипталар нархи 140 доллар қийматида қолдирилган. Бу ҳақда Азия Плюс агентлиги хабар қилмоқда.
Аввалроқ, “Ўзбекистон ҳаво йўллари” авиакомпанияси ҳафтасига икки марта – сешанба ва жума кунлари Душанбега парвозларни амалга ошираётган эди.
“Ўзбекистон ҳаво йўллари”нинг Душанбедаги ваколатхонасининг 3 июнь куни маълум қилишича, парвозларни қисқартириш сиёсий мазмунга эга эмас, аксинча йўловчиларнинг камлиги билан боғлиқ.
Душанбе халқаро аэропорти матбуот котиби Жамила Ҳусайнова ҳам парвозлар оралиғи қисқарганини тасдиқлаган. Унинг сўзларига кўра, уларга “Ўзбекистон ҳаво йўллари” МАКнинг расмий мактуби келиб тушган. Мактубда Тошкент-Душанбе-Тошкент йўналиши бўйича парвозларни қисқартириш тўғрисидаги қарор ҳақида ҳамда йўловчилар камлиги сабабли парвозлар иқтисодий жиҳатдан зарарли бўлгани маълум қилинган.
Жамила Ҳусайновага кўра, бир парвоз учун 17тадан 30тагача чипталар харид қилинган. Айрим йўловчилар 1200 сомони (140 долларга яқин) бўлган чипталарни харид қилиш уларга қийинчилик туғдирган. Тошкентдан биринчи доимий парвоз 11 апрель куни амалга оширилган эди. Сўнгги 25 йил ичида биринчи марта «Ўзбекистон ҳаво йўллари» МАК самолёти Душанбе аэропортига қўнган эди.
