Ироқ бош вазири Ҳайдар ал-Ободий Мўсул шаҳри ИШИД жангариларидан тўла озод этилгани ҳақидаги хабарга муносабат билдириб ўтди.
«Биз ИШИДнинг тугашини кўриб турибмиз, Мўсулнинг озод этилиши бу сўзларимни тасдиқлайди. Биз тўхтамаймиз, бизнинг жасур ҳарбийларимиз узил-кесил ғалабага эришадилар», — дея ёзган вазир твиттерида.
У Ироқ ИШИДнинг охирги жангариси ўлдирилмагунича ёки жавобгарликка тортилмагунича курашни давом эттиришини қўшимча қилган.
Бугун Ироқ Мудофаа вазирлиги Мосул ИШИДдан озод этилганини эълон қилди.
ИШИД Мўсул шаҳрини бундан 3 йил муқаддам босиб олганди. Ироқ Мудофаа вазирлиги вакилининг маълум қилишича, Мосулда ИШИД назорат қилаётган бирорта ҳам ҳудуд қолмаган.
Ўтган ҳафтада Ироқ армияси ИШИД раҳбари Абу Бакр ал-Бағдодий бундан 3 йил аввал «халифалик» эълон қилган Ан-Нурий масжиди атрофидаги ҳудуд устидан назорат ўрнатган эди.
