2017 йилнинг иккинчи чорагида Xiaomi 23,16 млн. смартфон етказиб берган ва бу кўрсаткич компания учун рекорд натижа ҳисобланади. 2017 йилнинг биринчи кварталига нисбатан ўсиш 70 фоизга тенг, деган vc.ru’га Xiaomi’дагилар.
Компаниядагилар икки йил вақт сарфланган муваффақиятли қайта тузилиш ҳисобига савдо ҳажми ошганини таъкидлашмоқда. Хусусан, Xiaomi ўз қурилмалари сифатини махсус назорат бўлинмаси ёрдамида яхшилашга муваффақ бўлди, дейди компания раҳбари Лэй Жюн ўз ходимларига мурожаатида.
Унинг қўшимча қилишича, 2016 йилда смартфонлар савдоси етказиб беришдаги узилишлар сабаб камайиб кетган, бироқ компания энди етказиб берувчилар билан ишлаш услубини ва бизнеснинг бошқа жабҳаларини ўзгартирган. Чакана савдонинг ошиши ҳисобига ҳам етказиб бериш ҳажми кўпайишига эришилган, дейди Жюн. Хитойда айни дамда 123 та Xiaomi бренд дўконлари фаолият кўрсатмоқда, 8 июль куни компания на 8 та дўконни фойдаланишга топширади.
Жюннинг фикрича, Xiaomi Хитойдан ташқаридаги бозорларга ҳам муваффақиятли кириб борган, Ҳиндистондаги маҳаллий смартфонлар бозорида иккинчи ўринга кўтарилиб олган. «Биз шунингдек, Индонезия, Россия, Украина ва бошқа бир қатор давлатларда ажойиб натижаларга эришмоқдамиз», — деди у. 2018 йилда компания 100 миллионта смартфон сотишни мўлжалламоқда (таққослаш учун: Apple 2017 йилнинг биринчи чорагида 50,8 млн.та iPhone сотган).
Xiaomi 2015 йилда ҳам ўз олдига ана шундай режа қўйган эди, бироқ кейинроқ компания мақсадини 80 миллионтага туширган, сўнгра 70 млн.та смартфон ишлаб чиқариб, уни бажара олмаган эди. 2016 йил якунларига кўра компания савдолар бўйича маълумотларни эълон қилмаган. Ўшанда Жюн Xiaomi «ҳаддан ташқари тез ўсаётгани»ни айтиб ўтган эди.
