АҚШ пойтахти Вашингтондаги савдо ва бизнес мажмуасида қўриқчилик қилиб юрган Knightscope K5 роботи кутилмаганда фаввора томонга йўл олиб, унга шўнғиди ва чўкиб кетди, деб ёзмоқда The Verge нашри.
Нашрга кўра, Knightscope роботи Georgetown Waterfront мажмуасида жойлашган "фавворага тўғри борган". Роботнинг ўзини бундай тутиши сабаби ҳозирча номаълум. Бундан ташқари, робот ишдан чиққан-чиқмаганига ҳам ойдинлик киритилмаган. "У ўзининг ишини ёқтирмаганмикан? У даҳшатли янгиликлардан хабар топгандир? У келажак ҳозир бўлмаслигини тушуниб етгандир?" — деб ёзади нашр.
Маълум қилинишича, ушбу роботларни ишлаб чиқарувчи Knightscope компанияси робот "ҳақиқий қўриқчидан яхшироқ эканини, чунки иш вақтида зерикмаслиги"ни таъкидлаганди.
Knightscope K5 роботи ракетасимон шаклга эга. Унинг вазни 136 кг бўлиб, бўйи 1,5 метрни ташкил этади.
