Андижон вилоятида гўшт учун бир хил нарх ўрнатилди - эндиликда вилоятда гўштнинг бир килоси 29 минг сўмдан сотиладиган бўлди. Бу ҳақда «Андижоннома» газетаси сайти хабар берган.
Нашр хабарида ёзилишича, вилоят ҳокими Шуҳратбек Абдураҳмонов 18 июль куни шаҳар ва туман ҳокимлари, прокуратура, ички ишлар, солиқ идораларининг ходимлари ва қассоблар, шунингдек, тегишли ташкилотлар раҳбарлари билан ўтказилган учрашувда шундай қарор қабул қилган.
Учрашув аҳоли томонидан бозорларда гўшт нархлари асоссиз равишда кўтарилаётгани ҳақида билдирган шикоятлар туфайли ўтказилган. Кейинги вақтларда вилоят ҳудудидаги бозорларда 1 кг гўшт учун нарх 34 минг сўмгача кўтарилганди.
«Муҳокамалар якунида вилоятда фаолият кўрсатаётган 622 та қассобхонанинг барчасида бир килограмм гўшт 29 минг сўмдан сотиладиган бўлди», — дейилган хабарда.
