Ёзнинг жазирама кунлар Европа футболида ҳам сезилмоқда. Янги мавсум олдидан ўз олдига маълум мақсадларни қўйган жамоалар одатдагидек трансферларга зўр беришмоқда. Сўнгги вақтларда Европада футболчилар нархининг кескин ошиб кетиши натижасида кўплаб рекордлар янгиланмоқда. Шунингдек бу ёзда ўтган йили ўрнатилган мутлақ рекорд ҳам янгиланиши кутилмоқда. Tribuna.Uz ёзнинг қолган бир ойдан кўпроқ муддатида амалга ошиши кутилаётган трансферлар топ-10лигини тақдим этади.
10. Федерико Бернардески
Бўлажак жамоаси: «Ювентус»
Нархи: 40 млн. евро
Бугун куннинг иккинчи ярмида Федерико Бернардески Турин клуби билан шартнома имзолаши кутилмоқда. Клуб расмий твиттери Бернардески клуб базасига етиб келганини тасдиқлади. Италия матбуотида ёзилишича, «Ювентус» 23 ёшли футболчи учун 40 миллион евро беради. Шунингдек Бернардескининг 10 фоиз ҳуқуқи ҳам «Фиорентина»да қолади.
9. Риёз Маҳрез «Лестер»
Қизиқаётган жамоалар: «Рома», «Арсенал»
Нархи: 45 млн. евро
2016 йилги мавсумнинг том маънодаги кашфиёти Риёз Маҳрез жамоаси билан ЕЧЛда иштирок этгани сабабдан ҳам «Лестер»да қолганди. Бу мавсумда эса «Лестер» яна ўз жойига қайтди ва энди жамоа етакчиси бошқа клубга ўтишни истамоқда. Олдинроқ жазоирлик футболчига «Арсенал» жиддий қизиқиш билдирганди. Бироқ унинг нархи сабаб музокаралар боши берк кўчага кириб қолди. Эндиликда «Рома» 26 ёшли яримҳимоячини ўз сафида кўришни истамоқда. «Лестер» Маҳрез учун 45 миллион евро талаб қилиб чиққан.
8. Иван Перишич, «Интер»
Қизиқаётган жамоа: «Манчестер Юнайтед»
Нархи: 50-60 миллион евро
«Манчестер Юнайтед» икки йил олдин чап қанотни Марсиал билан «бетонлаштирган» бўлса, бугунги кунга келиб, француз футболчиси Моуриньонинг ишончини қозона олмаяпти. Ўз вақтида трансфер суммаси жуда кўп шов-шувларга сабабчи бўлган Марсиал асосий таркибдаги ўрнини йўқотиб қўйди. Моуриньо эса уни ўзига келиб олишни кутгиси келмаяпти. Шу мақсадда жамоа «Интер»нинг хорватиялик вингери Иван Перишични сотиб олишни истамоқда. «МЮ»да сўнгги йилларда кузатилаётган ҳолат: унчалик ном чиқармаган футболчиларга катта пул таклиф қилаётгани бу ўринда ҳам кўзга ташланмоқда. Перишич Хорватия миқёсида машҳур футболчи бўлиши мумкин аммо Европанинг юқори савиясига 29 ёшида қанчалик жавоб бериши катта сўроқ остида. «МЮ» ана шундай футболчи учун 50 миллион евро таклиф қилмоқда. Энг қизиғи «Интер» шунга ҳам кўнганича йўқ. Уларнинг талаби 60 миллион евро.
7. Бенжамен Менди, «Монако»
Янги жамоаси: «Манчестер Сити»
Нархи: 57,5 миллион евро
«Манчестер Сити» ва ҳимоячи мавзуси ўзига хос классика. Оловнинг ёниши, сувнинг оқиши ва «Манчестер Сити»нинг ҳар йили рекорд даражадаги пулларни ҳимоячилар учун сарфлаши табиатнинг доимий қонунияти, деган ҳазиломуз чиқишлар бугун модада. Кайл Уокер Дэниэл Левидек «қаттиқ» бизнесмендан 56 миллион еврога (бонуслар билан) сотиб олингач, ҳимоячилар трансфери борасида рекорд такрорланганди. Бугунги кунга келиб, «Сити» энди мутлақ рекордни ўрнатмоқчи. Менди учун араб шайхлари «Монакога 57,5 миллион евро беришга рози бўлди. Ҳозирда француз футболчиси АҚШда «Сити» таркибида тиббий кўрикдан ўтаётгани айтилмоқда. Трансфер ҳақида яқин 48 соат ичида хабар берилиши кутилмоқда.
P.S. мақола тугатилиши арафасида «Манчестер Сити» расмий сайти Менди трансферини эълон қилди. У клуб билан 5 йиллик шартнома имзолади. Трансфер суммаси кутилганидек 57,5 миллион евро.
6. Виржил Ван Дейк, «Саутҳемптон»
Қизқаётган жамоалар: «Ливерпуль», «Челси», «Манчестер Сити»
Нархи: 70 миллион евро
Бенжамен Мендининг рекорди ҳам бу йил учун чегара бўла олмаслиги мумкин. Бунга айнан «Сотон»нинг нидерландиялик ҳимоячиси йўққа чиқариши мумкин. Аввалига футболчига «Манчестер Сити» ва «Челси» клублари ҳам қизиқиш билдирганди. Аммо унинг учун қўйилган нархдан сўнг жамоалар фикридан қайтди. «Ливерпуль» эса футболчини ўзини кўндиришга уриниб кўрди ва буни сезиб қолган «Саутҳемптон» ливерпулликлар устидан ариза ёзди. Шундан сўнг «Ливерпуль» расмий сайти орқали «Сотон» вакилларидан узр сўради ва бошқа Ван Дейкни безовта қилмасликка сўз берди. Орадан бир ойча вақт ўтиб энди Ван Дейк жамоага ультиматум қўйди ва кетмоқчи эканини айтди. «Ливерпуль» энди унинг учун 70 миллион евро беришга ҳам тайёр бўлиб турибди.
5. Пьер-Эмерик Обамеянг, «Боруссия» Д,
Қизиқаётган жамоалар: «Милан», «ПСЖ»
Нархи: 70-80 миллион евро
Томас Тухель «Боруссия»ни тарк этгач, Пьер-Эмерик Обамеянг ҳам жамоани тарк этиш ҳаракатига тушиб қолди. Аввалига футболчи учун «ПСЖ» даъвогарлик қилганди. Матбуотда икки клуб оғзаки келишувга эршигани ҳам хабар тарқатганди. Аммо кейинроқ бу битим ҳам ёлғон бўлиб чиқди. Эндиликда «Милан» Обамеянгни ортга қайтаришни кўзлаган. Футболчининг ўзи ҳам бунга қарши эмас, аммо дортмундликлар раҳбарияти уни ёзги трансферлар пайтида сотишни истамаяпти.
4. Андреа Белотти, «Торино»
Қизиқаётган жамоа: «Милан»
Нархи: 100 млн евро
Италия футболининг келажаги деб қаралаётган Андреа Белотти сўнгги вақтларда кўрсатган ўйини билан Европа трансфер бозорини ларзага келтирди. «Торино» унинг шартномасига нарх белгилади: 100 млн. Ҳозирда «Милан» футболчи билан жиддий қизиқмоқда. Мората «Челси»га ўтиб кетгач, эндиликда «Милан»нинг ҳужумчи борасидаги асосий мақсади айнан туринликлар етакчиси бўлмоқда.
3. Алексис Санчес, «Арсенал»
Қизиқаётган жамоалар: «Манчестер Сити», «ПСЖ»
Нархи: 60 млн. евро
Санчеснинг «Арсенал» билан бир йиллик шартномаси қолган. Шу боис унинг трансфер нархи бирмунча паст кўриниши мумкин. Аммо уни қўлга киритиш учун жиддий кўраш кечмоқда. Аввалига «Бавария» унинг учун курашган бўлса, эндиликда «ПСЖ» Неймар трансфери ўхшамацй қолганда айнан чилилик ҳужумчини ўз сафига олиб келишни мақсад қилиб турибди.
Бироқ футболчи учун энг асосий даъвогар ҳамон «Манчестер Сити» бўлиб турибди. Футболчи айнан шу клубда ўйнашни истамоқда. Гвардиоланинг ўзи ҳам собиқ шогирди билан ишлашни хоҳлаяпти. «Сити» унинг учун 60 млн евро тўлашга ҳам тайёр. Аммо, биргина муаммо бор: Арсен Венгер. Унинг айтишича, Санчес ҳеч кимга сотилмайди. Айниқса Англиядаги асосий рақобатчисига.
2. Килиан Мбаппе, «Монако»
Қизиқаётган жамоалар: «ПСЖ», «Реал», «Манчестер Сити», «Арсенал»
Нархи: 190 млн. евро
Ёзнинг дастлабки қисмида энг катта шов-шувларга сабаб бўлган трансфер Аввалига «Арсенал» ва «Ливерпуль» футбочи учун жиддий таклифлар тайёрлади. Бироқ бу нархлар 115 млн евродан ошмади. «Монако» уни 130 миллион еврога сотишга тайёр эканини билдирганди. Бироқ, кейинчалик футболчи билан қизиқувчи клублар «Монако» рухсатисиз музокаралар олиб бораётганини билиб қолган клуб унинг ФИФАга арз қилмоқчи эканини билдирди ва унинг трансфер нархини 190 миллион еврога оширди. Бу нархга уни ким сотиб олиши ҳозирча номаълум.
1. Неймар, «Барселона»
Қизиқаётган жамоа: «ПСЖ»
Трансфер нархи: 222 миллион евро
Июлнинг ўрталарига келиб кўпчилик Мбаппе трансфери ҳақида унутишни бошлади. Сабаби айнан мана шу шов-шув. Кутилмаганда Неймар «Барселона»ни тарк этгиси келиб қолди. «ПСЖ» ҳам унинг шартномасида кўрсатилган ақлбовар қилмас суммани тўлаб беришга тайёр эканини билдирди.
Ҳозирча ёзнинг энг асосий «сериал»и бўлиб турган бу трансфер ҳақида бир кунда ўнлаб янги маълумотлар чиқмоқда. Кимдир уни «Барселона»да қолади деса, кимдир уни «ПСЖ» билан қоп-қоп пуллар бўйича келишувга эришганини ёзмоқда. Ҳар холда бу ҳолат ёз ҳақиқий футболни соғиниб қолганларни зериктирмаяпти. Сўнгги хабарларга кўра, бу трансфернинг амалга ошиши жуда яқин. Ўз навбатида футбол тарихида ҳам алоҳида саҳифа очиладиган трансфер амалга ошиши кутилмоқда.