Қозоғистон таълим ва илм-фан вазири Ерлан Сагадиевнинг фикрича, кириллдан лотин алифбосига жуда эҳтиёткорлик билан ўтиш лозим, янги алифбо эса барчани қониқтириши ҳамда кенг муҳокамадан сўнг қабул қилиниши керак.
"Лотин алифбосига ўтишга келадиган бўлсак, бу муҳим лойиҳа. Бу ерда эҳтиёт бўлиш лозим, хато қилмаслик зарур. Жорий йилда қилиш керак бўладиган ягона нарса - барчани қониқтирувчи алифбони қабул қилишдир", - деди Сагадиев ҳукуматдаги брифинг давомида.
Унинг таъкидлашича, алифбонинг бир неча вариантини тайёрлаш, “уларни муҳокама қилиб, қандайдир алифбони қабул қилиш” керак. “Кейин эса лотинга ўтиш бўйича иш режасини йўлга қўйиш лозим. Бу борада махсус комиссия ташкил этилди, у ишламоқда”, - деган вазир.
Назарбоев апрель ойи ўрталарида ҳукуматга қозоқ тилидан лотин алифбосига ўтиш графигини тайёрлаш вазифасини топширди. Президентнинг “Мустақил Қозоғистон” давлат газетасидаги мақоласида эслатишича, 2012 йилда “Қозоғистон 2050” стратегиясида у лотин алифбосига 2025 йилга қадар ўтиш режалари ҳақида маълум қилганди. Назарбоевнинг кейинчалик аниқлик киритишича, 2017 йилнинг охирига қадар янги қозоқ алифбоси ва графикасининг ягона стандартини қабул қилиш керак.
