Ҳиндистон ҳарбий-денгиз кучлари 1 минг 500 кг атрофидаги героин моддасини олиб кетаётган кемани ушлади. Унинг қора бозордаги қиймати 545 млн АҚШ долларига тенг, деб хабар қилмоқда Reuters агентлиги.
Ҳиндистон ҳарбий-денгизчилари томонидан ушланган кема Панама байроғи остида MV Henry номи билан фаолият юритган. Ҳиндистон соҳил қўриқлаш хизмати бош директори ўринбосари С.Парамешнинг айтишича, у Гужарат штати Порбандар шаҳри яқинида қўлга олинган. Кема Дубайдан Гужаратдаги Аланг шаҳрига сузаётган бўлган.
Видеода MV Henry экипажи аъзоларининг қўлга олингани ва героин қопларининг кемада ёйиб қўйилганини кўриш мумкин. Экипаж аъзоларининг барчаси ҳиндистонлик экани айтилмоқда. Уларга нисбатан текширув ишлари бошлаб юборилган.
