Игор Слашчев (исм-фамилиялар ўзгартирилган) коллежни тамомласа-да, ўқув юртида ўргатилган, келажакда ўзи учун керак бўладиган касб-ҳунарнинг бошини тутмади. Ишсиз юриб, кўча-кўйда дуч келган юмушларни бажаришга одатланди. Бу эса унинг ахлоқига ҳам салбий таъсир кўрсатди. Бу орада ўғирлик жиноятини содир этганлиги учун икки бор судланди. Лекин у кўрсатилган бағрикенглик тамойилларидан ўзига тўғри хулоса чиқармади. Аксинча, “Ўрганган кўнгил, ўртанса қўймас” деганларидек, яна эски “иш”ини давом эттирди, деб ёзади “Ҳуқуқ” газетаси.
Пойтахтга келган Игор Слашчевга шаҳар бошқача кўринди. Йўллар, кўчалар ҳамма томонда машина. Қаровсиздек кўринаётган бу автомашиналар Игорнинг эски касалини қўзғади. Олмазор туманида кўчада турган “Нексия-2” автомашинасини эгаси йўқлигидан фойдаланиб олиб қочди. Маълум жойга етгач, машинанинг эҳтиёт ғилдирагини олиб, яширинди. Ғилдиракни эса нотаниш кишига 45 минг сўмга сотди.
Ишнинг осон кечганидан руҳланган Игор Жиззах шаҳрига келиб “фаолияти”ни янада кенгайтирди. У “Чорсу деҳқон бозори” ҳудудида турган “Дамас” автомашинасининг орқа ойнасини синдириб, 700 минг сўм нақд пул ва 5 кишига тегишли жами 1 млн. 600 минг сўм пул маблағи бўлган банк пластик карталарни олиб, жуфтакни ростлади.
Енгил даромад топиш пайига тушган Игор бу сафар тунги соат иккиларда шаҳардаги Улуғбек кўчасидаги хонадонлардан бирига дераза орқали киради. Бу ердан у 500 минг сўмлик “Самсунг” русумли телефон аппаратини ўғирлаб чиқади. “Ўлжа”сидан кўнгли тўлмаган Игор шу вақтнинг ўзида кўчадаги бошқа хонадонга киришни режалаштиради. Айланиб юриб, ўзига “объект” танлайди ва уйнинг дераза ойнасини синдириб, ичкарига киради. Бу ердан 500 минг сўм пул ва бошқа буюмларни олиб яширинади.
Игорнинг бу “юриш”лари тўхтамади. Орадан 5 кун ўтиб, шаҳардаги Бегариқ кўчасида пайдо бўлди. Бу ерда ҳам хонадонга дераза орқали кириб, 900 АҚШ доллари, 40 минг сўмлик кумуш узук, 980 минг сўмлик эркаклар тилла узуги, 2 млн. 500 минг сўмлик учта аёллар тилла узуги, 250 минг сўмлик бир жуфт аёллар тилла сирғасини олиб, воқеа жойидан яширинади.
Ҳар бир ишнинг интиҳоси бўлгани сингари Игор Слашчевнинг ҳам жиноятларига “нуқта” қўйилди.
Жиноят ишлари бўйича Жиззах шаҳар судининг ҳукми билан Игор Слашчевга 8 йил муддатга озодликдан маҳрум этиш жазоси тайинланди.
