Мариупол госпитали жарроҳлари сапёрлар иштирокида украиналик ҳарбийнинг оёғидан портламай қолган гранатани чиқариб олишди. Бу ҳақда Украина қуролли кучлари бош қўмондони маслаҳатчиси Алена Вербицкая Facebook’да маълум қилди.
"6 августдан 7 августга ўтар кечаси аксилтеррорчилик операцияси ҳудудидаги бўлинмалардан бири ўққа тутилганда Украина қуролли кучлари ҳарбийси яраланди. Граната Дмитрийнинг чап оёғига тегиб, унда тиқилиб қолган ва портламаган!", деб ёзган Вербицкая.
Унинг айтишича, ҳарбий зудлик билан ортга эвакуация қилиниб, биринчи ёрдам олган.
"Ярадор Мариуполдаги госпиталга етказилиши билан жарроҳлар сапёрлар билан бирга ўқ-дорини чиқариб олиш бўйича ноёб операция ўтказишди. Ҳозир аскарнинг аҳволи қониқарли баҳоланмоқда", деб қўшимча қилган Вербицкая.
Вербицкая саҳифасида шифокорлар операция вақтида бронежилетлар кийиб олишган суратларни ҳам жойлаштирган.
