Мьянманинг ҳуқуқлари поймол қилинаётган мусулмон исёнчилари Роҳиня ҳудудидаги 30 та полиция блок постлари ва армия базасига ҳужум қилиши оқибатида икки томондан жами 71 киши қурбон бўлди. Рейтер агентлигининг хабар қилишича, қуролли ҳужум қилганларнинг 59 аъзоси, хавфсизлик кучларининг 12 нафари ўлдирилган.
Қуролли тўқнашувлар ҳамон айрим ҳудудларда давом этмоқда. Инсон ва диний ҳақ-ҳуқуқларнинг жиддий поймол қилиниши туфайли ўтган йилнинг октябрь ойида мамлакат шимоли-ғарбий штатида бошланган зиддиятлар барҳам топаётгани йўқ.
The Arakan Rohingya Salvation Army (ARSA) – Аракан Роҳиня озодлик армияси (октябрь ойидаги ҳужумлар ижрочиси Ҳаракат ул Яқиннинг янги номи) мазкур ҳужум учун жавобгарликни ўз зиммасига олди.
Асосий аҳолиси Буддавийликка эътиқод қилувчи мамлакат бошқаруви бир неча 10 йиллик ҳарбий ҳукмронлигидан сўнг фуқаролик ҳукуматига ўтганидан сўнг, 1,1 млнлик Роҳиня мусулмонларининг ҳақ-ҳуқуқлари поймол этилиши ва уларнинг қирғин қилиниши билан боғлиқ жиноятлар энг жиддий муаммо бўлиб қолмоқда.
Аксари Ислом динига эътиқод қилувчи Роҳиня аҳолиси мамлакат фуқаролари деб ҳисобланмайди, аксинча улар Бангладешдан кириб келган ноқонуний муҳожирлар деб аталади. Улар асрлар оша шу минтақада истиқомат қилиб келганига қарамай, фуқаролик ҳуқуқларидан маҳрум этилмоқда.
