Ўзбекистондаги тиббиёт ОТМ битирувчиларининг 74 фоизи ўзи таълим олган йўналишда ишга жойлашди. 27 сентябрь куни Соғлиқни сақлаш вазирлигининг тиббий таълимдаги ислоҳотларга бағишланган матбуот анжуманида қатнашган KUN.UZ мухбири шу ҳақида хабар берди.
Тадбирда маълум қилинишича, 2016-2017 ўқув йилида тиббиёт йўналишида фаолият юритувчи олий таълим муассасаларини 3 197 нафар талаба тугаллаган. Шулардан 2 366 нафари, яъни 74 фоизи шу йўналиш бўйича ишга жойлашган. 445 нафари магистратура босқичида ўқишни давом эттирадиган бўлди, 250 нафари клиник ординатурасида бўлса, ишга жойлашмаганлар атиги 4 кишини ташкил қилади.
Шунингдек тадбирда тиббий таълим муассасаларига квоталар ошиб бораётган бўлса-да, кадрлар етишмовчилиги масаласи ҳали ҳам долзарб экани қайд этилди. Фан ва ўқув юртлар бошқармаси бошлиғи Ўктам Сафоевичнинг таъкидлашича, Ўзбекистонда ҳар 10 000 аҳолига 26,4 шифокор тўғри келмоқда. Бу республика миқёсидаги кўрсаткич, баъзи вилоятларда эса бу кўрсаткич 15-16 кишини ташкил қилади. Шундай бўлса-да, бу ўтган йилгига нисбатан баланд кўрсаткич экани таъкидланди.
