Туркия президенти Ражаб Тоййиб Эрдўған украиналик ҳамкасби Пётр Порошенко билан ўтказилган қўшма матбуот анжуманида ухлаб қолмаслик учун бор кучини сарфлади. Эснашга қарши курашган Эрдўған видеосини Sputnik Туркия агентлиги Twitter саҳифасига жойлади.
Эрдўған эснаб, кўзларини юмган, бошини кафтларига қўйган, ҳатто Порошенко ҳамкасбининг диққатини тортиш учун онда-сонда столни тақиллатишга мажбур бўлган.
9 октябрь куни Эрдўған Киевга расмий ташриф билан келди. Порошенко матбуот котиби Святослав Цеголконинг қайд этишича, Украина ва Туркия президентлари ўртасидаги музокаралар белгиланган 45 дақиқа ўрнига 3 соат давом этган.
Twitter фойдаланувчиси FilizATAR4 эса, мазкур ҳолатда Tom and Jerry мультфильмини ёдга олган. Унда мудроқ босган мушук ухлаб қолмаслик учун пластир билан қовоғини пешонасига ёпиштириб қўяди. Аммо, Эрдўғаннинг лавозимларини санаб, уни тўғри тушунганлар, ачинганлар ҳам топилди.
«Туркия Жумҳурияти президенти, бош вазири, ташқи ишлар вазири, Бош штаб бошлиғи ва б. У чарчайди», — деб қайд этган @1freedomman142.
