Nissan компанияси кун чиқар юртда ўтаётган мотор-шоуда концептуал электр машинасини тақдим этди, деб ёзади Kolesa.ru
Тўрт ўриндиқли кроссовер IMx деб номланди, у айнан Nissan электрокарлари учун яратилган мутлақо янги платформада қурилган. IMx ҳар бир ўқи учун алоҳида жойлаштирилган иккита электр мотор билан жиҳозланган. Двигателларнинг суммавий унумдорлиги 435 от кучини ташкил этади, умумий максимал айлантирувчи моменти — 700 Нм. Янги автомобилнинг юриш захираси 600 км.ни ташкил этади. Кроссовер электр токини қайтариб ҳам беради, масалан энергиянинг ортиқчасини қайтариш учун уни уй тармоғига улаш ҳам мумкин.
Nissan IMx автоном бошқариш ProPilot тизимининг янги версиясига эга бўлди — машина инсон иштирокисиз ҳам юра олади. Автопилот ишга туширилганида рул чамбараги олд панель остига беркинади ва ҳайдовчи ҳамда йўловчи ўтирган олд ўриндиқлар улар сайрдан баҳра олишлари учун бироз орқага сурилади.
Қайд этиб ўтиш керакки, ProPilot технологиясидан аллақачон Serena минивэни ва Leaf электрокарида фойдаланилмоқда, бироқ бу моделларда тизим фақат автомагистралларда, шунда ҳам танланган полосада ишлайди: электроника тезлатувчи, тормоз ва рулни назорат қилади. IMx концепти ProPilot келажакда қандай эволюцияга учраши кераклигини кўрсатиб беради.
Салонда бутун бўйламасига OLED-дисплей ўрнатилган ва у ён ойналарга қадар давом этган. Экранга барча керакли маълумотлар чиқариб турилади. Дарвоқе, Imx’да оддий тугмалардан мутлақо фойдаланилмаган. Ўриндиқларнинг бош ёстиқчалари 3D принтерда чоп этилган.
Imx’ни серияли ишлаб чиқариш масаласида Nissan ҳали тайинли бирор гап айтганича йўқ. Норасмий маълумотларга кўра, концепт 2019 йилда сотувга чиқариладиган электрокроссовернинг дебочаси ўлароқ тақдим этилган.
Токиода ўтаётган автосалонда Nissan компанияси яна бир неча янгиликларни намойиш этган. Уларнинг орасида Leaf Nismo’нинг прототипи ва аллақачон серияли ишлаб чиқарилаётган Serena Nismo ҳам бор.
