1963 йилда суиқасд уюштирилган АҚШнинг собиқ президенти Жон Кеннедининг ўлдирилиши билан боғлиқ 3 мингга яқин ҳужжат илк бор эълон қилинди. 2891 та ҳужжатдан иборат маълумотлар базаси АҚШнинг Миллий архивлар сайтида жойлаштирилган.
Бу Кеннедининг ўлдирилиши билан боғлиқ ҳужжатларнинг навбатдаги қисмидир, аввалгиси 24 июлда эълон қилинган ва 3,9 минг ҳужжатдан иборат бўлган. Яна бир неча минг ҳужжат 2018 йил апрелигача ошкор этилади, деб маълум қилди Оқ уй.
АҚШ президенти Дональд Трамп жамият Кеннедининг ўлдирилиши ҳақида батафсил маълумотга эга бўлишга ҳақли эканини айтган. Шу билан бирга Трамп миллий хавфсизлик нуқтаи назаридан тегишли идораларга ҳужжатлар матнининг баъзи жойларини ўзгартиришга рухсат беришдан бошқа иложи йўқлигини таъкидлаб ўтган.
