Италия жаҳон чемпионатига плей-офф босқичида биринчи ўйинни ютқазди. Швеция майдонида кечган биринчи учрашувдан 0:1 ҳисобида мағлубият билан қайтган итальянлар жавоб учрашувида камида икки гол уриши талаб этилади.
Италияликлар бу ўйинда Жампьеро Вентура даврида анъанага айланган 4-2-4 ўрнига 3-5-2 схемасидан фойдаланди, аммо бу схема кўрсатган натижа шу бўлдики, Швецияга қарши ўйинда фақат бир марта зарба берилди - ҳимоячи Дармианнинг зарбаси тўсиндан қайтди.
Лекин Вентура учун шу ҳам етарли экан, у мағлубиятни адолатсиз, деб атади.
«Мен Буффон бирон жиддий сэйв қилганини эслай олмайман - улар хавфли вазиятлар яратишмади. Биз бунга йўл қўймадик. Бизда эса жуда хавфли ҳужум бўлди - дарвоза тўсини тўпни қайтарди».
У ўйиндаги ҳакамликдан ҳам нолиган. «Умид қиламанки, Миланда бизга ҳакамлар бугун Швецияга рухсат берган каби рухсат беришади».
У бу гапи билан Тойвоненнинг Бонуччига қилган қўполлигини назарда тутганди. Ўйиннинг 30-сониясиданоқ италиялик ҳимоячи бурни синган ҳолда ҳаракат қилишни бошлади.
«Уни майдондан четлатиш керак эди. Қаттиққўлроқ ҳакам бўлганида бу ўйинда камида битта футболчига қизил карточка кўрсатган бўларди», дея ишонч билан гапирди ўйиндан кейин Бонуччи.
Айни вақтда интернетда #VenturaOut ҳештеги оммалашди. Италиялик мухлисларга терма жамоа жаҳон чемпионатидан қолиб кетиш хавфи остида қолиб кетгани умуман ёқмаяпти.
Биринчи ва охирги марта Италиясиз жаҳон чемпионати 1958 йилда кузатилган. Ўшанда барчаси ақлга сиғмас даражада рўй берганди. Ўша жаҳон чемпионатигача ўтказилган мундиалда икки марта чемпион бўлган Италия саралаш босқичида муаммога дуч келади. Лекин италияликларни охирги турда Шимолий Ирландия билан ўйинда дуранг ҳам қониқтирарди.
Аммо бу тарихга табиат араралашади. Ўйинни бошқариши керак бўлган венгриялик ҳакам Иштван Жольт (у Венгриядаги опера театрида ишлаган) қалин туман туфайли Лондонда ушланиб қолиб, Белфастга етиб бора олмайди. Натижада, ўйинга британиялик ҳакамлар тайинланади, италияликлар эса бунга қаттиқ норозилик билдиришади.
Якунда ФИФА бу ўйинни ўртоқлик учрашуви мақомида ўтказиш ҳақида қарор чиқаради. Ўйинда италияликларни қониқтирадиган натижа - 2:2 ҳисоби қайд этилганди. Ўйин ўта асабий руҳда ўтган, мезбон жамоа фанатлари стадионга тушиб кетишганди.
Бир ой ўтиб, расмий учрашув ҳам ўтказилади, аммо бу ўйин Италиянинг 1:2 ҳисобидаги мағлубияти билан тугайди ва итальянлар илк марта мундиалдан қолиб кетишади.
1998 йилда ҳам Италия саралаш босқичида муаммога дуч келган. Аммо ўшанда мовий гвардия Россияга қарши ўйинларда (1:1, 1:0) устун келиб, Франциядаги мундиалга илиниб қолганди.
Эътиборли жиҳати ўшанда, Москвада ўтган биринчи ўйинда Жанлуижи Буффон асосий дарвозабон жароҳати туфайли терма жамоадаги дебютини ўтказганди. Энди Жижининг ўзи ҳам 20 йиллик саргузаштлари плей-оффда тугаши мумкинлигини истисно этмаяпти: «Бундай оғир вазиятда воқеалар ривожининг турли вариантлари бор. Ҳатто шунақаси ҳам».
