Бугунги кунда юртимизга ташқаридан товар-моддий бойликларни олиб кириш бўйича аниқ тартиблар ишлаб чиқилган, бу меъёрларнинг асосий мақсади энг аввало юртдошларимиз саломатлиги шунингдек, ички ишлаб чиқарувчилар манфаатларини ҳимоя қилишга қаратилган.
Аммо, айрим шахслар томонидан афсуски, амалдаги тартибларга риоя қилмаган ҳолда, ўз манфаатини юқори қўйиш ҳолатлари аниқланмоқда.
Ана шундай ҳолат яқинда Самарқанд вилояти божхона бошқармаси ходимлари томонидан тақиқланган материаллар ҳамда махсус рухсатномалар талаб этувчи товар-моддий бойликларни ноқонуний олиб ўтишга ҳаракат қилган йўловчи юкида фош этилди. Бу ҳақда Самарқанд вилояти божхона бошқармаси ахборот хизмати хабар бермоқда.
Амалдаги тартибларга мувофиқ, божхона чегараларини кесиб ўтаётган жисмоний шахслар ўзлари билан олиб ўтаётган товарлар ҳақида йўловчи божхона декларациясида ва божхона ходимининг оғзаки сўровлари пайтида маълум қилишлари шарт. Бу талабни “Домодедово-Самарқанд” йўналиши билан ҳаракатланган фуқаро Н.Исмаилов (Ф.И.Ш. ўзгартирилган) четлаб ўтмоқчи бўлди.
Фуқаро Н.Исмаилов божхона ходими билан ўтказилган оғзаки сўровида, ўзи билан олиб кирилиши тақиқланган аудио ва видео ёзувлар ҳамда йўловчи божхона декларациясида ёзиб кўрсатилмаган товарлар йўқлигини маълум қилган.
Шундан сўнг, унга тегишли бўлган багаж ва сумкалар божхона назоратидан ўтказилганда, унда йўловчи божхона декларациясида ёзиб кўрсатилмаган 60 дона ҳар бири 1 литр ўлчамли идишларга қадоқланган “Акарицид” номли қишлоқ хўжалик экинлари зараркунандаларига қарши ишлатиладиган дори воситаси, 4 дона “Эдам SE-3” маркали “Эликтрокардиограф” номли ва 1 дона “DUS 60” маркали “EDAN” номли тиббиёт мосламаси борлиги аниқланган.
Шу билан бирга, фуқаро Н.Исмаиловга тегишли бўлган уяли телефон текширилганда, ушбу телефон хотирасида 100 дона беҳаё мазмундаги видео файл борлиги маълум бўлган.
Экспертиза хулосаларига кўра, уяли телефонда мавжуд файлдаги видео тасвирлар порнографик мазмунга эга эканлиги, “Акарицид” номли дори воситаси Ўзбекистон Республикаси қишлоқ хўжалигида рухсат этилган ҳимоя воситалари рўйхатига киритилмаганлиги, олинган 2 турдаги тиббиёт буюмларини сотиш ва тиббиёт амалиётида қўлланиши тақиқланганлиги қайд этилган. Фуқаро Н.Исмаиловдан олинган товарларнинг қиймати салкам 90 млн. сўмни ташкил этади.
Шундай қилиб, фуқаро Н.Исмаилов декларациясиз товар ёки бошқа қимматликларни жуда кўп миқдорда Ўзбекистон Республикасининг божхона чегарасидан ўтказишда ифодаланган хатти-ҳаракатларида Ўзбекистон Республикаси Жиноят кодексининг 182-моддасида кўрсатилган жиноят аломатлари мавжудлигини инобатга олиб, унга нисбатан мазкур модда билан жиноят иши қўзғатилди.
Рақамларга мурожаат қилсак, 2017 йил ўтган даври давомида “Самарқанд-аэропорт” божхона пости ходимлари томонидан аниқланган 242 та божхона қоидабузарликлари натижасида қиймати салкам 594 млн. сўмлик товар-моддий бойлик маҳсулотларининг ноқонуний олиб ўтилишига чек қўйилган.
