Россия президентининг матбуот котиби Дмитрий Песков президент Владимир Путин кортежи йўлида 50 га яқин портловчи қурилма қўйилгани ҳақида ўнлаб ёлғон қўнғироқлар олингани ҳақида маълум қилди.
“60 га яқин қўнғироқ олинган, уларда турли объектларда, жумладан президент кортежининг йўлида ва президент Санкт-Петербургда ташриф буюриши керак бўлган объектлар ёнида умумий ҳисобда 50 та портловчи қурилма қўйилгани ҳақида маълум қилинган”, деб айтди Песков.
Хавфсизлик хизмати ушбу вазиятда имкони бор барча ишни бажарган. Шу билан бирга ушбу иш ортиқча ноқулайликларга олиб келмаслигига эътибор қаратилган.
Песковнинг таъкидлашича, бу ишлар президент жадвалига таъсир кўрсатмаган.
“Бу қўнғироқлар хориждан амалга оширилган. Ҳанузгача манба аниқланмаган. Бошқа томондан, эрта-кечми бу манбалар аниқланади, бунга шубҳа йўқ. Бу телефон безорилари, террорчилари, уларни ҳар қанақасига аташ мумкин. Эртами-кечми улар албатта топиладилар”, деб қўшимча қилган Песков.
Телефон орқали бомбалар қўйилгани ҳақида ёлғон хабарлар берилиши Россияда 11 сентябрдан бошланган ва 75 та ҳудудни қамраб олган. Икки ой ичида Россиянинг 186 та шаҳарида бомба қўйилгани ҳақида кўп сонли қўнғироқлар туфайли 2,3 млн киши эвакуация қилинган. Бирорта ҳам ҳолатда таҳдид тасдиқланмаган. Россия Федерал хавфсизлик хизматининг баҳолашича, Москванинг ўзида “миналаштириш” ҳақидаги ёлғон хабарлардан 150 млн рубль зиён кўрилган.
