Англия премьер-лигаси 17-туридан ўрин олган учрашувлар бу сафар ҳафтанинг ўртасида ўтказилмоқда. Бу сафарги турда ҳам бир қатор қизиқарли воқеалар кузатилиши мумкин. Мисол учун, «Суонси» меҳмони бўладиган Хосеп Гвардиола бошчилигидаги «Манчестер Сити» ғалаба қозонган тақдирда Англия премьер-лигаси тарихида ғалабали серия бўйича мутлақ рекордчига айланиши мумкин.
Шу ва бошқа жуда кўплаб қизиқарли фактларга бой тур ўйинларига Tribuna.Uz анъанавий равишда батафсил тўхталиб ўтади.
Англия премьер-лигаси
17-тур
«Ҳаддерсфилд Таун» – «Челси»
Бошланиш вақти: 13 декабрга ўтар кечаси, 01:00
Трансляция: Futbol TV, Матч ТВ, Матч! Футбол 1.
Ўйинолди қизиқарли фактлар
«Ҳаддерсфилд Таун» АПЛ доирасида ўз уйида кечган сўнгги 4 учрашувнинг 3тасида ғалаба қозонган, фақатгина «Манчестер Сити»га қарши учрашувда имконият бой берилган.
«Ҳаддерсфилд» 16 учрашувдан сўнг 18 очко тўплаб, ўтган йили АПЛга чиққан учала чемпионшип вакиллари «Бёрнли» (16), «Мидлсбро» (15) ва «Ҳалл Сити»дан (12) ҳам кўпроқ очко тўплашга муваффақ бўлган.
«Жон Смит» стадиони «Челси» учун АПЛда ғалабага эришилган 50-стадион бўлиши мумкин. Бу борада жамоа энг яхши кўрсаткичлар бўйича «Ливерпуль» (53та стадионда ғалаба қозонган), «Арсенал» ва «МЮ»дан (иккаласи — 50) кейин тўртинчи жамоадан бири бўлиб турибди.
Эден Азар шу кунга қадар «Челси»нинг АПЛдаги 99 голида иштирок этган (62 гол, 37 голли пас) ва у бугун «Челси» тарихида бу маррани забт этган тўртинчи футболчи бўлиши мумкин. Ҳозиргача лондонликлар сафида Фрэнк Лэмпард (237та голда иштирок этган), Дидье Дрогба (159) ва Жанфранко Зола (101) 100лик довондан ошишга муваффақ бўлган.
Йўқотишлар
«Ҳаддерсфилд» таркибида янги жароҳат олганлар йўқ. Раджив Ван Ла Парра дисквалификациядан сўнг, Майкл Ҳефеле эса жароҳатидан сўнг сафга қайтади.
«Челси» ҳужумчиси Альваро Мората ва Давид Луиз жароҳати сабаб бу учрашувда майдонга туша олмайди. Яримҳимоячи Дэнни Дринкуотер эса тузалиб, ўйинга тушишга шай бўлиб турибди.
«Суонси» – «Манчестер Сити»
Бошланиш вақти: 14 декабрга ўтар кечаси, 00:45
Трансляция: UzReport TV, Матч! Футбол 1.
Ўйинолди қизиқарли фактлар
«Манчестер Сити» 15-ғалаба сари қадам ташламоқда. Агар жамоа бу ишни уддаласа, «Арсенал» томонидан 2002 йил, икки мавсумда ўрнатилган 14 учрашувлик мутлақ рекордни янгилаган бўлади.
«Манчестер Сити» Премьер-лига доирасида «Суонси»га қарши ўйинларнинг 75 фоизида (12 учрашувдан 9тасида) ғалаба қозонган. Бу жамоанинг АПЛда беш мартадан ортиқ дуч келган рақиблари билан учрашувлардаги энг яхши кўрсаткич саналади. «Сити» ҳеч бир жамоа билан ўйинларда бу қадар кўп фоизда ғалаба қозонмаган.
Умуман, «Суонси» АПЛга қайтганидан буён «Сити»ни фақат бир марта (2012 йил, март) мағлуб этган. Ўшанда жамоа лигада дебют қилганди. «Манчестер Сити» эса якунда узоқ танаффусдан сўнг чемпионликни қўлга киритганди.
«Суонси» таркибида тўп сураётган «Манчестер Сити»нинг собиқ футболчиси Вильфрид Бони кетма-кет икки учрашувда гол уришга муваффақ бўлди ва бу турда гол урса, 2014 йилнинг октябридан буён илк марта кетма-кет учта учрашувда гол киритишни уддалаши мумкин бўлади.
Кевин Де Брюйне бир тақвим йилида 17та голли пас беришга улгурди. Бу борада фақатгина Месут Ўзил (2015 йилда 20та) ва Тьерри Анри (2003 йил 19та) ундан яхшироқ кўрсаткич қайд этган. Кевинда бу борада рекорд ўрнатиши учун яна 4 учрашув бор.
Йўқотишлар
«Манчестер Сити» таркибида жароҳат олган Жон Стоунз ва Бенжамен Менди сафига ҳафта охирида Венсан Компани ҳам қўшилди. Бу уч футболчи ҳам яқин вақтларда жамоасига ёрдам бера олмайди.
«Суонси» таркибида эса бундай йўқотишлар йўқ.
«Ливерпуль» – «Вест Бромвич»
Бошланиш вақти: 14 декабрга ўтар кечаси, 00:45
Трансляция: Матч! Арена
Ўйинолди қизиқарли фактлар
«Ливерпуль» Премьер-лига доирасида «Вест Бромвич»га қарши 8 учрашувдан буён мағлубиятга учрамай келмоқда (4 ғалаба, 4 дуранг), бундан олдин эса кетма-кет 3та учрашувда (2таси «Энфилд»да) мағлуб бўлганди.
«Вест Бромвич» «Энфилд»да ўтказган сўнгги 6 учрашувида (2 ғалаба, 1 дуранг, 3 мағлубият) камида битта бўлсада гол киритишни уддасидан чиқмоқда. Умумий ҳисобда шу даврда жамоа мезбонлар дарвозасига 8та гол киритишга муваффақ бўлган.
«Ливерпуль»нинг «Энфилд»даги (барча мусобақаларда) мағлубиятсиз ўйинлари сони 14тага (8 ғалаба, 6 дуранг) етди.
Муҳаммад Салоҳ 2013/14 йилги мавсумдан буён барча мусобақаларда 20тадан ортиқ гол киритган «Ливерпуль»нинг илк футболчиси бўлиши мумкин. 4 мавсум аввал Луис Суарес ва Дэниэл Старридж бу натижани забт этишганди.
«Манчестер Юнайтед» – «Борнмут»
Бошланиш вақти: 14 декабрга ўтар кечаси, 01:00
Трансляция: Futbol TV, Матч ТВ.
Ўйинолди қизиқарли фактлар
«Борнмут» Премьер-лига доирасида «Манчестер Юнайтед»га қарши 4 марта майдонга тушган бўлиб, уларнинг барчасида ҳеч бўлмаса битта гол киритишга муваффақ бўлган. 4 учрашувнинг биттасида ғалаба қозонган.
«Борнмут» Премьер-Лига доирасидаги тўртта учрашувдан буён меҳмонда мағлубиятга учрамаяпти. Бу энг узоқ давом этган сериялардан бири (2016 йилнинг январидан мартигача 5та кетма-кет учрашувда ютқазмаган).
Ромелу Лукаку АПЛ доирасидаги «Борнмут»га қарши 4 учрашувда 5та гол киритган. Жумладан, сўнгги марта (6-3, «Эвертон» сафида 2017 йил февралда) бўлиб ўтган учрашувда покерга эришган.
Жермейн Дефо «Юнайтед» дарвозасини «Тоттенҳэм» ва «Вест Ҳэм» футболчиси сифатида ишғол қилган. Агар у бу турда гол урадиган бўлса,«қизил иблислар» даврозасини уч хил жамоа сафида ишғол қилган 8 футболчи сафига қўшилади.
Йўқотишлар
«Манчестер Юнайтед» таркибида Эрик Байи жароҳати, Поль Погба дисквалификация туфайли учрашувни ўтказиб юборади. «Борнмут»да бу борада муаммолар йўқ.
«Тоттенҳэм» – «Брайтон»
Бошланиш вақти: 14 декабрга ўтар кечаси, 01:00
Ўйинолди қизиқарли фактлар
«Брайтон» Ҳарри Кейн АПЛда дуч келган 27-жамоа бўлиши мумкин. Кейн олдин ўйнаган 26 турли жамоаларнинг 25таси дарвозасини ишғол қилишга муваффақ бўлган. Фақат «Кардифф Сити»га қарши ўйинларда у муваффақият қозона олмаган.
Кейн АПЛда 2017 тақвим йилида 32 учрашувда майдонга тушиб, 33та гол киритишга муваффақ бўлган. Алан Ширер томонидан 1995 йилда ўрнатилган рекорд (36та гол) натижага яна 3та гол етишмаяпти.
«Брайтон» жорий мавсумда дарвозаларга энг кам (135та) зарба берган жамоа саналади. Шунингдек, клуб сўнгги 4 учрашувда 1та гол ура олган.
Сон Ҳёнг Мин «Тоттенҳэм» таркибида сўнгги 11 учрашувда майдонга тушиб, 9та голда (6 гол, 3 голли пас) иштирок этган.
Йўқотишлар
«Тоттенҳэм» таркибида Тоби Алдервейрелд, Ян Вертонген ва Виктор Ваньяма жароҳати сабаб майдонга туша олмайди. Эрик Ламела узоқ танаффусдан сўнг яна асосий таркибда майдонга тушиши имкониятига эга бўлади.
«Вест Ҳэм» – «Арсенал»
Бошланиш вақти: 14 декабрга ўтар кечаси, 01:00
Трансляция: Матч! Футбол 2
Ўйинолди қизиқарли фактлар
«Арсенал» «Вест Ҳэм»ни меҳмонда 12 маротаба мағлуб этган. Бошқа бирорта жамоани улар бунчалик кўп меҳмондаги учрашувда юта олмаган.
Бу «Вест Ҳэм»нинг ўз уйида ўтказаётган 100-дербиси бўлади. Шу кунга қадар жамоа 99 марта ўз уйида Лондон дербисини ўтказган бўлиб, уларнинг 36тасида ғалаба (22 дуранг, 41 мағлубият) қозонган.
Оливье Жиру яна битта учрашувда захирадан майдонга тушиб гол урса, АПЛда битта жамоа сафида захирадан майдонга тушиб гол уриш бўйича Оле-Гуннар Сульшерга тегишли (17та гол урган) рекордини янгилаши мумкин.
Месут Ўзил «Вест Ҳэм»га қарши сўнгги 3 учрашувдан буён гол урмоқда, шунингдек, сўнгги икки учрашувдан буён камида битта голли пасни амалга оширишнинг уддасидан чиқяпти.
Йўқотишлар
«Вест Ҳэм»да йўқотишлар йўқ. Чичарито умумий гуруҳга қайтган ва бу учрашувда майдонга тушиши мумкин.
«Арсенал» таркибида Санти Касорла узоқ муддатдан буён ўйнамаётган бўлса, Шкодран Мустафи унинг сафига қўшилган, Тео Уолкотт эса майдонга тушиши мумкин.
Бошқа учрашувлар
«Бёрнли» - «Сток Сити»
Бошланиш вақти: 13 декабрга ўтар кечаси, 00:45
«Кристал Пэлас» - «Уотфорд»
Бошланиш вақти: 13 декабрга ўтар кечаси, 01:00
«Ньюкасл» - «Эвертон»
Бошланиш вақти: 14 декабрга ўтар кечаси, 00:45
«Саутҳемптон» - «Лестер»
Бошланиш вақти: 14 декабрга ўтар кечаси, 00:45
Азамат Муродов тайёрлади
