Россиялик тадбиркор Алишер Усмонов эндиликда телевизион бизнес билан шуғулланмайди. У “Ю”, Disney, “Муз-ТВ”, СТС, “Домашний”, “Че” ва CTC Love телеканалларидаги улушини ўзининг анча йиллик ҳамкори Иван Тавринга сотиб юбормоқда.
Таврин Усмоновнинг ЮТВ телевизион холдингидаги улушини сотиб олишга тайёргарлик кўрмоқда. Бу ҳақда иккита манба РБК нашрига маълум қилган. Шунингдек, Усмоновнинг вакиллари ҳам бу маълумотни тасдиқлашган.
Усмоновнинг активларини бошқарувчи USM Holdings директорлар кенгаши аъзоси Иван Стрешинскийнинг маълум қилишича, “телевизион активлар улар учун устувор бўлмаган, Таврин учун улар доимо устувор аҳамият касб этган”.
“ЮТВнинг медиабозорда бундай тажрибага эга бўлган бир одам қўлида жамланиши холдинг учун янги имкониятлар яратади”, деб айтган Стрешинский.
“Ҳа, мен жаноб Усмоновга тегишли улушни сотиб олмоқдаман”, деб маълум қилган Таврин, бироқ битим суммаси ва унинг ёпилиши муддатлари бўйича изоҳ беришни истамаган.
Битим натижасида Таврин ЮТВга эгалик қилувчи "Новый Медиа Холдинг" МЧЖнинг 58,29 фоизини сотиб олади ва ундаги улушини 100 фоизга етказади.
ЮТВ “Ю”, Disney, “Муз-ТВ”, СТС, “Домашний”, “Че” ва CTC Love телеканалларини бошқаради.
USM’да таъкидланишича, айни вақтда томонлар битим бўйича келишиб олишган ва Федерал антимонопол хизмати томондан тегишли рухсатни кутмоқдалар.
Усмонов ва Таврин 2009 йилда ўз активларини бирлаштириб, медиабизнес бўйича ҳамкорларга айланганлар. Усмонов ўшанда “Муз-ТВ” ва 7ТВ телеканалларига, Тавриннинг “Медиа-1” гуруҳи 30 та ҳудудий телестанцияга эгалик қилган.
Усмонов ва Таврин Forbes версияси бўйича Россиянинг энг бой одамлари рўйхатига кирадилар. Нашрнинг охирги рейтингига кўра, Усмонов ҳозирда 15,2 млрд долларлик актив билан 5-ўринни, Таврин эса 500 млн доллар билан 199-ўринни эгалламоқда.
Ҳозирда Усмонов активлари орасида “Металлоинвест”, Байкал тоғ компанияси, “МегаФон”, “Коммерсантъ” нашриёти уйи, “Химки Групп” девелоперлик компанияси бор. Таврин эса USM Holdings’да улушга эга ва ҳудудий радиостанцияларни бошқарувчи “Выбери радио” холдингининг асосий эгаси ҳисобланади. Таврин 2016 йил баҳорида “МегаФон” бош директори лавозимини ўз лойиҳалари билан шуғулланиш учун тарк этган.
