Москва полицияси 2017 йилнинг апрелида Санкт-Петербург метросида террорчилик акти уюштирган ака-укалар Аброр ва Акрам Азимовларнинг отаси Аҳрол Азимовни ҳибсга олган. Катта Азимовнинг нега ушланганига ойдинлик киритилмаган, деб ёзади Kloop.kg.
Аҳрол Азимовнинг яна бир ўғли Билол Азимов Kloop.kg журналистига тушунтириш беришича, ўзининг ушлангани ҳақида отаси унга WhatsApp орқали ёзиб юборган.
«Тафсилотлардан хабарим йўқ, отам Москвада уни ушлашганини ёзиб юборди. Ҳозир у Кунцево ИИБда ушланиб турибди. Сабабини айтишгани йўқ, ҳозир биз адвокатлардан янгилик кутмоқдамиз», — деган Билол.
Билол Азимовнинг фикрича, отасининг ушланишига сабаб унинг журналистлар билан ўғилларининг айбсизлиги ва уларга нисбатан қийноқ қўлланилаётгани ҳақида суҳбатлашгани бўлиши керак.
Кунцево полиция бўлинмасида Аҳрол Азимовнинг ушлаб турилганини тасдиқлашган, бироқ бунинг сабабини айтишдан бош тортишган.
Россия ҳукумати ака-ука Аброр ва Акрам Азимовни 2017 йилнинг апрелида Санкт-Петербург метросида портлаш уюштиришда айблаб келади. Азимовлар Қирғизистонда туғилишган.
Айблов эълон қилингач, ака-уканинг отаси видеомурожаат суратга олиб, ўғилларини «қийнаётганлар»ни жазога тортишни сўраган.
«Уларнинг бошига елим халта кийдириб, улар қилмаган ишларни бўйнига олишга мажбурлашган. Бундай қийноқлардан кейин ҳар қандай инсон ўзи қилмаган ишларни бўйнига олиши муқаррар», — деган у.
Аброр Азимовнинг таъкидлашича, уни 4 апрель куни ҳибсга олишган, ФХХ эса унинг ушланганини фақат 17 апрелга келибгина эълон қилган. Акрамни эса расман 19 апрель куни ушлашган, бироқ қариндошлари МХДҚ ходимлари уни 15 апрель куни Ўшдаги касалхонадан Москвага олиб чиқиб кетишганини таъкидлаб келишади.
Азимовларнинг ўзи терактга алоқадорлигини мутлақо рад этиб келишмоқда. Аввалига айбини бўйнига олган Аброр Азимов кейинчалик кўрсатмаларининг барчасидан воз кечган.
Айбланувчиларнинг адвокатлари иқрор бўлишлари учун улар қийноққа солинганини таъкидлаб келишади. Азимовлар қийноқлар ҳақида хабар беришганидан сўнг ҳам улардан бири шикоятини қайтариб олишга «мажбур» бўлади — адвокатнинг фикрича ФХХ ходимлари унга босим ўтказишган.
Суд ҳар икки Азимовни, уларнинг отаси ва оила аъзоларини фуқароликдан маҳрум этган. Human Rights Watch ҳуқуқ ҳимоячилари ташкилоти бу қарорни танқид остига олиб, Россия ҳукуматини терактни синчиклаб тергов қилишга, айбланувчилар ва уларнинг юристларга босим ўтказмасликка чақирган.
Ҳуқуқ ҳимоячилари, шунингдек, Акрам Азимов Москвага қандай келиб қолгани ва Ўшдаги касалхонадан уни ким олиб чиқиб кетганини аниқлашга чақирган.
Санкт-Петербургдаги теракт 2017 йилнинг 3 апрелида рўй берган. Портлаш 16 кишининг ҳаётига зомин бўлган, 100 дан ортиқ киши жабрланган. Тергов портлаш вақтида ҳалок бўлган қирғизистонлик Акбаржон Жалиловни теракт ижрочиси деб ҳисоблайди.
Ака-ука Азимовлар эса ўзларининг қўлга олинишини «саҳналаштирилган» дея таъкидлаб келишади.
