АҚШ президенти Дональд Трамп маъмурияти шундай стратегияни илгари сурмоқдаки, у Boeing ҳамда Airbus компаниясининг Эрон авиакомпанияларига юзлаб лайнерлар сотиш бўйича режаларига халақит бериши мумкин, деб хабар берди Wall Street Journal нашри америкалик амалдорларга таянган ҳолда.
Нашр маълумотларига кўра, АҚШ маъмурияти Эрон авиайўналишлари янги ёки эски йўловчи самолётларидан Сурияга қурол-яроғ ҳамда ҳарбийларни жўнатишда фойдаланиши мумкин эканидан хавфсирамоқда. Трампга тақдим этиладиган вариантлар ўз ичига савдога тақиқ ҳамда самолётларни етказиб беришга халал бериши мумкин бўлган қаттиқ шартлар жорий этилишини қамраб олиши эҳтимоли бор.
Нашрнинг хабар беришича, Эронга Airbus Европа авиаконцерни самолётларини етказиб берилиши АҚШ томонидан тўхтатиб қўйилиши ҳам мумкин, сабаби эҳтиёт қисмларнинг аксарияти Америкада ишлаб чиқарилади.
Эрон ва халқаро воситачиларнинг "олтилиги" (Россия, АҚШ, Буюк Британия, Хитой, Франция, Германия) 2015 йилнинг 14 июль куни Эрон атоми бўйича кўп йиллик муаммога ечим топиш тўғрисидаги тарихий келишувга эришди: Қўшма кенг кўламли ҳаракатлар режаси қабул қилинди, унинг бажарилиши эса Эрондан аввал БМТ Хавфсизлик Кенгаши, АҚШ ҳамда Евроиттифоқ томонидан жорий этилган иқтисодий ва молиявий санкциялар олиб ташланишини англатади.
Ўтган йили эса Эроннинг Iran Air авиакомпанияси Американинг Boeing ишлаб чиқарувчиси билан 80 та самолётни етказиб бериш бўйича шартнома имзолади. Режаларга кўра, Iran Air яқин 10 йил ичида 50 та Boeing 737 ҳамда 30 та Boeing 777 самолётини қабул қилиб олиши лозим эди. Американинг Boeing корпорацияси ва Эроннинг Iran Aseman Airlines авиакомпанияси июнда Теҳронга 60 та Boeing 737 MAX самолётини етказиб бериш ҳақида шартнома имзолаган.
