«Барселона» собиқ ярим ҳимоячиси, ҳозирда Каталония клубида директор лавозимини эгаллаб турган Гильермо Амор Испания «класикоси» доирасида «Реал»га қарши бўлиб ўтадиган учрашув ҳақида ўз фикрларини билдириб ўтди.
Аморнинг хабар беришича, кўк-анорранглилар «қаймоқранглиларга» чемпионлик йўлагини ташкил этиш ниятида эмас.
«Бизнинг клубда чемпионлик йўлаги одатда «Барселона» иштирок этган мусобақаларда ғалаба қозонганлар учун ташкил этилади», - дея Аморнинг сўзларини келтиради Marca.
«Реал» 16 декабрь куни клублар ўртасидаги жаҳон чемпионати финалида «Гремио»ни 1:0 ҳисобида мағлубиятга учратди.
Ўйиндан кейин берган интервьюсида Криштиану Роналду «Барселона» уларга чемпионлик йўлакчаси ясашларидан умидворлиги ҳақида гапирганди.
«Барселона»ни мағлубиятга учратиб, чемпионлик пойгасида интрига сақлаб қолишимизга умид қиламан. Биз ҳар бир лаҳзадан завқ олишимиз керак.
Ўзимизга бўлган ишончни орттириб олдик ва энди чемпионат турнир жадвалидаги ўрнимизни яхшилаб олишдан умидвормиз.
Албатта бўлажак ўйин олдидан «Барселона» биз учун чемпионлик йўлакчаси ясаб, олқишлар билан кутиб олса яхши иш бўларди», – дея Роналдунинг сўзларини келтиради Mundo Deportivo нашри.
Эслатиб ўтамиз, «Реал» – «Барселона» жамоалари ўртасидаги баҳс Испания чемпионатининг 17-тури доирасида 23 декабрь куни бўлиб ўтади. Учрашув Тошкент вақти билан 19:00да бошланади.
