Францияда чоп этилувчи болалар журнали Youpi’да Исроил ноқонуний давлат деб аталди ва Шимолий Кореяга қиёсланди. Бу ҳақда i24news телеканали хабар бермоқда.
Журналдаги маълумотларга Исроилнинг Франциядаги элчиси Ализа Бин-Нун ҳам эътибор қаратган. У буни “куракда турмайдиган ҳолат” деб атаган ва мақола антисемит кайфиятлар келтириб чиқаришини айтган.
Гап шундаки, журналдаги мақолада дунёда “давлат” деб тан олинган 197 та давлат борлиги айтилган. Журнал Франция, Германия ва Жазоирни бундай давлатлар қаторига киритган. Журналда таъкидланишича, шу билан бирга дунёда ҳамма давлатлар томондан ҳам “давлат” деб тан олинмайдиган тузилмалар бор бўлиб, улар қаторига Исроил ва Шимолий Корея киритилган.
Франция яҳудий ташкилотлар кенгаши раҳбари Франсис Калифа i24news билан суҳбатда журналдаги мақолани “сиёсийлашган” деб атаган ва БМТ 1948 йилда Исроилни мустақил давлат деб тан олганини эслатиб ўтган. У, шунингдек, журнални чоп этувчи компанияга хатони тўғрилаш ва журналнинг кейинги сонида Исроил қандай давлат экани ҳақида тушунча берилишини талаб қилиб хат йўллаган.
