Япония барча давлатларни Шимолий Корея билан дипломатик алоқаларни узишга ва шимолий кореялик ишчиларни чиқариб юборишга чақирди. Бу ҳақда Япония ташқи ишлар вазири Таро Коно маълум қилди.
“Шимолий Корея Сеул билан мулоқот қилаётганини санкциялар наф бераётганининг исботи сифатида талқин қилиш мумкин. Ҳозир барча давлатлар учун БМТнинг тегишли резолюцияларини бажаришга содиқликларини кўрсатиш вақтидир. Бу Шимолий Корея билан дипломатик алоқаларни узишни ва шимолий кореялик ишчиларни чиқариб юборишни ўз ичига олиши мумкин”, деб айтган Коно Ванкуверда Шимолий Корея бўйича ўтган учрашувда.
Кононинг таъкидлашича, йил Шимол ва Жануб ўртасидаги мулоқотларнинг қайта йўлга қўйилиши билан бошланди, бироқ ядровий ва баллистик ракеталар дастурларини тўхтатиш томон силжиш йўқ.
“Биз биргаликда Шимолий Корея ўз сиёсатини қуролсизланиш томон ўзгартириши учун унга максимал даражада босимни кучайтиришимиз лозим”, деб айтган Коно.
Ҳозирда Канаданинг Ванкуверида бир қатор давлатлар ташқи ишлар вазирларининг Шимолий Корея бўйича учрашуви ўтмоқда.
2017 йил декабрда БМТ Хавфсизлик кенгаши Шимолий Кореяга нисбатан янги халқаро санкциялар киритди. Резолюция қолган бандлардан ташқари, БМТга аъзо барча давлатларга шимолий кореялик меҳнат муҳожирларини ватанларига 2019 йил охиригача қайтаришни буюради.
